МОЙВИНЫ

Мойвины кадакыв паськыда бергалӧ Емваса, Печора йывса, Сыктывкар бердса, Эжва йывса сёрнисикасъясын. Сыӧн вӧдитчӧны гижӧда кывйын. Сылӧн вежӧртасыс: мыйкӧ кодлыкӧ вичмыны, кодлыкӧ усьны шуд, кодлыкӧ мыйкӧ лӧсявны.

Шуам: кольӧм гожӧмӧ пӧрысьмӧм бать-мамлы мойвиӧма шойччыштны шоныд саридз дорын.

Мойвины кывлӧн вужйыс юргӧ ӧтмоз мой пемӧс нимкӧд, коді рочнас шусьӧ бобр, но сійӧ некыдзи абу йитчӧма сыкӧд. Найӧ ас костаныс омонимъяс.

Рӧдвуж финн-йӧгра войтыр сёрниын мойвинылы весьтас сулалӧны маті вежӧртаса кадакывъяс. Ӧткодялӧй: Мариысь: муаш — аддзыны, кӧні -аш- инфинитив артмӧдысь суффикс. Шуам: муаш кулеш книгам — аддзыны колана небӧг (книга). Эрзя мордваысь: муемс — аддзыны вежӧртас жӧ кутӧ, -мс- суффиксыс артмӧдӧ инфинитив. Шуам: вирьста муемс панго — вӧрысь аддзыны тшак. Эстысь mӧіstma кадакыв тӧдчӧдӧ «тӧдмавны, гӧгӧрвоны» вежӧртас, вепсысь mustatіz кыв нимтӧ нӧдкыв, финнысь muіstaa висьталӧ помнитны, чайтны.

Коми мойвины кадакывлы удмурт сёрниын весьтас сулалӧ мадиськыны — мойдны, мойд висьтавны кывтэчас. Кыв туялысьяс лыддьӧны, мый -дь-ыс сэні кыв артмӧдысь суффикс, кодлы комиын лӧсялӧ -йд- морфема мойд, мойдны кывъясын.

Мойвины кадакывйысь позьӧ торйӧдны мой вуж, кодлы рӧдвуж кывъясын лӧсялӧны: мари -му-, мордва -му-, эст -тӧ-, финн -ти-, вепс -ти-, удмурт -ма- да -в- кыв форма артмӧдысь суффикс, сэтшӧм жӧ, кыдзи и аддзывны — аддзыны, волывны — волыны, кыскывны — кыскыны кыв гозъяс ӧтлааститігӧн.

Кыдзи тыдовтчӧ рӧдвуж финн-йӧгра кывъяскӧд орччӧдалӧмысь, мойвины коми кадакыв артмылӧма ёна важӧн нин, мари, удмурт, мордва, вепс, финн, эст войтыркӧд миян пӧль-пӧчьяслӧн оліганыс на.

Сылӧн кыввужйыс юрганногнас ӧткымын рӧдвуж войтыр сёрниын кӧть и торъялыштӧ, но найӧ мӧда-мӧдныскӧд йитчӧмаӧсь: веськавны, лӧсявны, аддзыны, тӧдны ӧтласа вежӧртаснаныс.