ВӦТАСЯ ПОЖНЯ СИКТӦС
«Коми му» газетӧ тшӧкыда гижлӧ Сосногорск районса сиктъясын олысь коми войтыр йылысь В. И. Хозяинов. Бӧръя кык-куим вонас сійӧ йӧзӧдіс аслас сьӧм вылӧ некымын небӧг, кӧні туяліс олан нэмсӧ Пожнялысь, Акимлысь, Уквавомлысь, Винлалысь. Ӧні гижӧ Попанпи (Порожск) йылысь небӧг.
Валерий Ивановичлӧн мамыс чужлӧма Аким сиктын, батьыс — Пожняын. Ачыс велӧдчылӧма Уквавомын. Сідзкӧ, тайӧ сиктъясыс сылы ичӧтсяньыс донаӧсь. Сійӧн и сэтшӧм шоныда гижӧ сэтчӧс войтыр йылысь, зільӧ тӧдмавны медводдзаясӧн овмӧдчысьяссӧ, кодъяс керавлӧмаӧсь сьӧд вӧр шӧрын пуяссӧ, медым тшупны керкаяс, лӧсьӧдны мӧс видзан картаяс, гидъяс, гӧра-кӧдза вӧдитан муяс, ылі видзьяс, чӧс туйяс.
Олӧмыс оз сулав, мунӧ водзӧ. Ӧнія том йӧз и мӧвпыштны оз кужны, мый вӧвлӧма кад, кор абу вӧлӧма электрическӧй би, радио, телевидение. А налӧн пӧль-пӧчныс бура на тӧдӧны карасина лампасӧ да пеша бисӧ.
Туясьысь, пемыдыслысь ӧдзӧссӧ восьтыштысь — тадзи позьӧ шуны В. И. Хозяинов — Ӧнтяр Вань Валерий йылысь, кыдзи тӧдӧны сійӧс пожнясаяс.
Сійӧ вӧчӧ чужан му пыдісянь туялӧм могысь тӧдчана удж. Ичӧт сиктъяслӧн, кыдзи и йӧзкостса вомгора поэзиялӧн, гижӧм историяыс абу. Ичӧт сиктлӧн историяыс олӧма йӧзлӧн тӧд выланыс. Кор оз нин лоны найӧ, унатор вунас сиктлӧн сӧвман туйысь. И Валерий Иванович вӧчӧ зэв колана удж — мудзлытӧг юасьӧ арлыдаяслысь важъя олӧм йывсьыс да вочасӧн лэдзӧ небӧг бӧрся небӧг сы йылысь, кыдзи пуксьылӧма олӧмыс Изьва бердса коми сиктъясын.
Валерий Хозяиновӧс ышӧдӧ сійӧ, мый сиктъяслысь историясӧ туявны сылы ыджыд кӧсйӧмӧн отсалӧны арлыда войтыр. Сідзкӧ, сылӧн уджыс воӧ сьӧлӧм вылас налы, кодъяслысь быд лунъя олӧмсӧ туялӧ писькӧс вежӧра морт.
Лоӧ кӧ гижӧма сиктлы подув пуктысьяс, чужанін сӧвмӧдысь-нимӧдысь войтыр йылысь, сідзкӧ, водзӧ олысьяс кутасны тӧдны ассьыныс важ пӧль-пӧчнысӧ, кодъяс сывдісны кӧдзыд войвывса мунысӧ пӧсь лов шынаныс, лӧсьӧдісны шоныд керкаясын тыр вир-яя олӧм, кытчӧ вочасӧн воис и югыд би, и радио, и ӧтуввез-интернет. Сідзкӧ, и водзӧ сӧвмас ичӧт сикт, сэтчӧс олысьяслы нӧшта на донаджык лоас чужаніныс, коді мортыдлӧн дзик ӧти. Ӧд кытчӧ кӧть оз веськав сійӧ, нэм кежлас медся донаӧн кольӧ бать-мамыслӧн, пӧль-пӧчыслӧн чужаніныс, кӧні кыліс комиӧн
«чой-воклысь сёрнитӧмсӧ,
бать-мамлысь бурсиӧмсӧ».
Ме ачым петавлі Пожня сиктысь, вӧвлі уна йӧз муын, аддзысьлі уна кывъя войтыркӧд. Ӧні ола йӧгра муын. И татчӧс олӧмыс быттьӧ гажа серпасъяс, кинокадръяс, кодъяс абу збыльвывсаӧсь.
Войяснас ме вӧтася Пожня сиктӧс, матысса да ыліса рӧдвужӧс. Мойвиас кӧ коркӧ волыны чужанінам, аддзывлыны ичӧтсянь тӧдса йӧзӧс, налысь ныв-писӧ, ачымӧс кыла тырвыйӧ шудаӧн. Сэк, овлӧ, окота шуны Анна Григорьевна Хозяинова пӧчӧй моз:
«Енмӧ-вердысьӧ! Видз Изьва бокса сиктъяссӧ лёкысь. Сет налы мывкыд да дзоньвидзалун. Мед оз быр нэмӧвӧйся коми кывйыс сэтчӧс йӧз пӧвстысь. Медым унджык быдмас сэні Валерий Хозяинов кодь писькӧс вежӧраыс, чужан мусӧ радейтысьыс».
