ОГ ВУНӦДӦЙ

Шог юӧр воис неважӧн Финляндияысь: лӧддза-номъя 8 лунӧ дыр висьӧм бӧрын кувсьӧма профессор Маръя Лейнонен, коми кывйӧ пырӧдчысь, уна кыв тӧдысь морт. Мудор сайын миянлысь чужан кывнымӧс туялӧны оз унаӧн, та вӧсна быд татшӧм воштӧмыс зэв дойдана.

Маръя Лейнонен чужлӧма 1946 вося тӧвшӧр 16 лунӧ да гимназияын велӧдчигас на пондӧма сюся велӧдны кывъяс, ветлӧдлӧма Европа пасьтала да велӧдӧма немеч, англия, швед, француз, роч, латыш кывъяс, быдмӧма Тампере университетса профессорӧдз.

25 во сайын сюсь ань арлыда мортӧн нин пырӧдчис коми кыв туялӧмӧ, буретш сэки ме нуӧді Хельсинки университетын коми кывйысь курс. Удж вӧснаыс сійӧ эз вермы ветлыны урокъяс вылам, велӧдіс кывсӧ ас кежас. Маръя ачыс менам отсӧгӧн ӧти воӧн тӧдмаліс грамматика да кужис нин вуджӧдчыны да Куратовсянь Юшковӧдз ставсӧ лыддьыны.

Та бӧрын зэв регыдӧн пондіс гижавны коми кыв туялан статьяяс кадакыв, синтаксис да кыввор йылысь, кыкысь воліс командировкаӧ Сыктывкарӧ, лыддис докладъяс.

Сійӧ сьӧлӧмсяньыс отсавліс Суомиӧ веськалӧм коми аспирантъяслы да туялысьяслы, лышкыда козьнавліс колана небӧгъяс, унаысь корліс ас патераас рытпукны Хельсинкиӧ миянсянь волысьясӧс, пыр юасьліс республикаын лоӧмторъяс йылысь. Сылӧн вӧліны гырысь кӧсйӧмъяс водзӧ туявны коми кыв, сӧмын тай оз ставыс артмы...

Ми, коми кывтуялысьяс, сылӧн тӧдсаясыс, ог вунӧдӧй тайӧ вежӧра аньсӧ, сылысь вӧчӧмторъяссӧ. Небыдін да шоныдін сылы!