КОКНИА ДА НИНӦМ ДЗЕБТӦГ
Уна-ӧ казьтылан небӧг позьӧ лыддьыны комиӧн? Та вылӧ уналы вочакывйыс оз сюр, ӧд ас йывсьыс торъя небӧг эз кольны Нёбдінса Виттор ни Илля Вась, Геннадий Юшков ни Альберт Ванеев, А. К. Микушев ни А. И. Туркин, уна мукӧд нималана коми морт. Найӧ ловъя дырйиыс век кытчӧкӧ тэрмасисны, зілисны унджык вӧчны-керны да эз удитны гижны ни йӧзӧдны-кольны ас бӧрсяыс мемуаръяс.
Тайӧ тырмытӧмторсӧ шуӧма бырӧдны Коми муын нималана профессор, филологияса доктор, коми кыв туялысь да уна во чӧж студентъяслы сійӧс велӧдысь Евгений Александрович Игушев. Локтан воӧ сылӧн сибалӧ тшупӧда арлыд лун, та вӧсна зэв любӧ лоӧ ставныслы лыддьыны сылӧн «Ас кывлӧн ловзьӧдан гор» небӧгысь збыльысь кузь олӧмсьыс босьтӧмторъяс йывсьыс, быттьӧ суныштлыны бӧрӧ кольӧм кадколастъясӧ, ӧні вылісянь вунӧдны зіляна Сӧвет воясӧ.
Евгений Александрович чужлӧма Изьва йывса Пожня сиктын да тырвыйӧ тӧдлӧма сэкся став тужа-нужасӧ, но век велӧдчылӧма, зільӧма босьтны тӧдӧмлун, помалӧма Коми педагогика институт да Мӧскуа карын аспирантура, дорйӧма кандидатлысь да докторлысь диссертацияяс, велӧдӧма Сыктывкарса университетын 1973 восянь да быдмӧма профессорӧдз. Ханты-Мансийскын 11 во уджалӧм бӧрын воӧма да ӧні зільӧ миян юркарын, велӧдӧ томуловӧс Коми Республикаса каналан служба академияын.
Олӧма нин авторлӧн зэв бур юрвежӧрыс, паметьыс, юрас кокниа кутӧ уна йӧз да накӧд аслыспӧлӧс лоӧмторъяс йылысь юӧр, кывлӧм бур мӧвпъяс.
Дзоньнас казьтылан небӧгас водзкывйысь кындзи эм 25 юрпас, кытчӧ дженьыда гижӧма медводз аслас велӧдысь Илля Вась (В. И. Лыткин), аслас ёртъяс Игӧ Васьӧ Володь (В. В. Тимин) да Юрий Рочев, Евгений Семёнович Гуляев да А. К. Микушев йылысь, аскотырса бур ёрт да коми гижысь Альбина Ануфриева йылысь, кодӧс, вӧлӧмкӧ, ас сиктас нимтылӧмаӧсь Шура Альбинаӧн.
Евгений Александрович нималӧ и кыдзи уна кыв тӧдысь морт. Найӧс велӧдӧм могысь вель дыр олӧма Венгрияын, Швецияын, Суоми, Эст да Удмурт муясын да с. в. Сэтчӧясӧ ветлӧм-мунӧм йывсьыс да уджъёртъяс йывсьыс сійӧ тшӧтш гижӧ. Небӧгас пасйӧма и Сибырӧ уджавны ветлӧм йылысь.
Выль пӧжассӧ «ньылыштан» ӧти здукӧн, гижӧма ӧд сійӧс кокни да гӧгӧрвоана коми кывйӧн. Ставсӧ гижӧма веськыда, нинӧм дзебтӧг. Тайӧ небӧгсӧ быд лыддьысь вермас тырвыйӧ нимкодясьны мыла чужан кывнас, сылӧн сибыдлунӧн да озырлунӧн. Казьтылан небӧгсӧ Е. А. Игушев йӧзӧдӧма ас сьӧм вылас.
