НЕБӦГЫС БУР. КОЛӦ ЛЫДДЬЫНЫ

Дзик на неважӧн «Анбур» небӧг лэдзанін йӧзӧдӧма филологияса доктор Анатолий Ракинлысь «Вӧр-васа олысьяс» выль небӧг.

Небӧгыслӧн тиражыс абу ыджыд, а ӧд сӧмын библиотекаыс республикаын куимсё сайӧ. Видлам кӧ ӧткодявны Сӧвет кадӧ йӧзӧдлӧм татшӧм небӧг тиражъяскӧд, серпасыс артмӧ гажтӧм. Шуам, Анатолий Ракинлысь жӧ 1989 воӧ Коми небӧг лэдзанін йӧзӧдлӧма быдмӧг нимъяса кывкуд, рочӧн кӧ, «Краткий коми-русский, русско-коми ботанический словарь». Тиражыс вӧлӧма 10 сюрс небӧг! А ӧнія небӧгыд оз на ставлы и вичмы. Бур сӧмын, мый пыртӧма кӧ лоӧ петассӧ ӧтуввезйӧ, сійӧс вермас лыддьыны-видлавны быдӧн ас канмуын дай мусяр пасьтала.

Зіль туялысьлӧн тайӧ небӧгыс зэв мича артмӧма. Вӧр-васа став ловъя лолыслы вӧчӧма уна рӧма фотосерпас. Та понда любӧ лоӧ пӧрысьлы и томлы, весиг ичӧт челядьлы.

Уджсӧ торйӧдӧма юкӧнъяс вылӧ да ставсӧ найӧс тэчӧма анбур серти, А-сянь Я-ӧдз. Шуам «Пыста» висьтторйын медводз юӧртӧма, кыдзи нимтӧны тайӧ кайсӧ перым-комияс (пыстӧг), удмуртъяс (пислэг) да рочьяс (синица). Сэсся серпасалӧма лэбачсӧ, петкӧдлӧма позсӧ, сикасалӧма Коми муын олысьяссӧ: ыджыд пыста (большая синица), юрпыста (хохлатая синица) да вӧрпыста (московка). Висьталӧма нӧшта, кыдзи гозйӧдчӧ-рӧдмӧ. И тадзи гижӧма висьтъяссӧ вӧркань, гулю, ва тӧрӧкан, квайтпалич, кӧин, кынь, малямуш да уна-уна мукӧд йылысь.

Кывкӧртӧд пыдди колӧ пасйыны, мый татшӧм выль петасыс зэв колана чужан кыв да вӧр-ва радейтысьлы, томуловлы и верстьӧлы... Торйӧн аттьӧ авторыслы чужан кывйӧн вӧдитчӧмысь, ӧнія туялысьяс пӧвстысь зэв нин ӧд этшаӧн гижӧны комиӧн. Анатолий Ракинлӧн выль мича небӧгсӧ вузалӧны юркарын Печать керкаса «Ордым» лавкаын.