АТТИЛА ДОБОӦС КАЗЬТЫШТАМ
Шог юӧр воис Венгрияысь: вӧлӧмкӧ, лӧддза-номъя тӧлысьӧ нин сувтӧма сьӧлӧмыс Аттила Доболӧн, коми кыв тӧдысь-туялысьлӧн, Комиын уналы тӧдса велӧдысьлӧн.
Сійӧ чужлӧма 1955 вося моз тӧлысь 13 лунӧ Австрияын.
Сэні тшӧтш олӧны венгръяс, а айыс сылӧн вӧлӧма рӧднас Сербияысь.
1975–1983-ӧд воясӧ Аттила велӧдчӧма Венаса да Будапештса университетъясын, пырӧдчӧма фин-угор кывъяс туялӧмӧ, медсясӧ кыскӧма сійӧс коми кыв, кодӧс велӧдӧма аслас велӧдыссянь, профессор Карой Редеисянь.
Коми кывйӧ отсалӧма пырӧдчыны тшӧтш Венгрияын уна во чӧж уджалысь филологияса кандидат Надежда Дмитриевна Манова. Аттила эз вӧв кабинетын нускысь-пукалысь да комиӧн сӧмын лыддьысьысь-туялысьӧн, сійӧ век зільӧ вӧлі сёрнитны да гижасьны комиӧн.
Медводдзаысьсӧ сійӧ волӧма Сыктывкарӧ 1985 воӧ финно-угроведъяслӧн 6-ӧд войтыркостса ӧксьӧма вылӧ, мӧдысьсӧ воліс нин дыр кежлӧ — 1992–1993-ӧд воясӧ велӧдіс Коми каналан педагогика институтын немеч кыв да водзӧ пырӧдчис коми кывйӧ, ветлӧдліс сиктъясӧ, сёрнитіс йӧзыскӧд комиӧн.
Зілис тшӧтш паськӧдны тані венгр кыв: тӧдмӧдіс чужан кывнас Сыктывкарса канму университетын фин-угор факультетысь студентъясӧс да нуӧдіс фин-угор шӧринын быд окотитысьлы курсъяс.
Ме тшӧтш ветлі сэтчӧ, сэки велӧдчим важинас, Куратов уличаын сулалысь стрӧйбаас на. Ӧтлаын велӧдісны венгр кывсӧ Сергей Габов (сэки студент на), радиоысь журналист Галина Ведерникова, бурдӧдысь Дмитрий Манов, культура министерствоысь Татьяна Сердитова да мукӧд (видзӧд снимоксӧ).
Аттила зэв сьӧлӧмсяньыс зілис гӧгӧрвоӧдны велӧданторсӧ, сьыліс-ворсӧдіс венгр ног.
Уна коми морт дорӧ сійӧ сэки волӧма, некымынысь ветлӧма Ыбӧ коми гижысь Владимир Безносиков дорӧ, мукӧдлаӧ. Видзӧдӧ вӧлі быд коми спектак-концерт.
Став сьӧлӧмнас велӧдысьным тӧждысис-висис коми кыв да войтыр вӧсна, шулывліс, миянлы пӧ колӧ ӧтвывджыка да повтӧмджыка овны, колӧ пуктыны ас водзаным гырысь могъяс, оз ков родны ас муаным да с. в.
Уна во чӧж Аттила Добо уджалӧма Венгрияын Печса университетын, велӧдӧма сэні уралистика да окотитысьяслы коми кыв, кутлӧма йитӧд Сыктывкарысь аслас уна уджъёрткӧд.
Венгрияын кык туялысь бура тӧдісны коми кыв, тайӧ Карой Редеи да Аттила Добо.
Помтӧг жаль, некоднанныс нин оз паныдасьны миянкӧд таладор югыдас. Казьтыштам бурӧн Аттила ёртӧс, коми кыв туялысьӧс да коми йӧзлы быд бурсӧ кӧсйысьӧс.
Югыдін сылы да шоныдін.
