ПУДБОЛ-КОКСЯРЫС ЗБЫЛЬЫСЬ ИЧӦТ!

Бӧръя кык дас воӧ коми кыв вель ёна озырмис выльӧн артмӧдӧм кывъясӧн. На пиысь унаӧн гижӧд кывйӧ пыран выйынӧсь нин (ӧтуввез «интернет», изэрд, помшуӧм, биава «водка»), но зэв на уна кыв кольӧ вӧзйӧмторйӧн, да йӧзӧдзыс найӧ эз на воны.

Бӧръяяссьыс позьӧ вайӧд­ны коксяр кыв, коді пасйӧ «футбол». Коми йӧз эськӧ ас ногыс жӧ кывсӧ шуӧны да — пудбол. Рочӧ футбол кывйыс пырӧма англия кывйысь XІX нэм помын, тайӧ ворсӧм паськалігас. Тайӧ кывйыс артмӧма кык юкӧнысь: foot «кок» да ball «сяр, мач». Коми коксяр кывйыс буретш тадзи жӧ артмӧ, кыдзи тшӧтш суоми да эст кывъясын артмӧдӧ­ма татшӧмсяма кывъяс: финн. jalkapallo, эст. jalgpall, вуджӧдны кӧ, тшӧтш коксяр jalka + pallo. Комиын сяр юкӧнӧн артмӧма нӧшта ки­сяр «волейбол», кудсяр «бас­кетбол», васяр «ватерполло», пызансяр «бильярд». Со кутшӧм винёв вӧлӧма коми кывным!

А ӧні бергӧдчылам миянгӧгӧрса олӧмлань. Гажтӧм, дерт, кор уна коми выль кыв оз казявны да омӧля пыртӧны сёрни-гижӧдӧ. Нӧшта гаж­тӧмджык, кор олӧмас кок­сяр кыдзи спортсикас тшӧтш омӧля сӧвмӧ, эз вӧв сӧвмӧма сійӧ республикаын и войдӧр. Уна во чӧж Комиын мед­сясӧ вынавліс лызьӧн кот­ралӧм, мача хоккей да вермасьӧм. Бӧръя воясас пондісны зэв ёна сёрнитны ичӧт коксяр-пудболысь залын ворсӧм йылысь. Лӧсьӧдӧма лои республикаса «Новая ге­нерация» котыр. Сэтчӧ коралӧны ыджыд сьӧм вылӧ весиг легионеръясӧс, мудор сайысь, Испанияысь нисьӧ Италияысь котралысь-чужъясьысь зонъясӧс. Сьӧмыс та вылӧ тырмӧ. Весигтӧ «Коми гор» телерадиокомпанияын кадысь кадӧ петавлӧ залын ворсан коксярлы сиӧм торъя уджтас. Шуам, коми культуралы сиӧм торъя уджтас абу, а ичӧт коксяр йылысь эм. Ура дай сӧмын!

Сӧмын ӧтитор падмӧдӧ — оз ёна бура ворсны «генерациясаыс», век кодлыкӧ ворссьӧмаӧсь. Сэк жӧ ӧдва ловъя важысянь нималысь мача хоккейӧн ворсысь «Строитель» котыр. Сылы сьӧмсӧ республика оз сет весиг гырысь ордйысьӧмӧ пырӧдчыны. Некыдз оз эштӧдны Раиса Сметанина нима лызьӧн котралан комплекс. Этша кыпӧдӧны сиктъясын спортшкола да варччанін. Дай ылӧдз оз ков мунны: юркарын хоккейысь ывласа унджык ворсаніныс тӧвбыд лымйӧн тырӧма.

Окота юавны, кытысь петіс тайӧ «Выль генерацияыс»? Сёрни ветлӧ, кутшӧмкӧ ыджыд чиналы пӧ ковмӧма тайӧ спортсикаснас республикаӧс нимӧдны Россия пась­тала да та могысь некутшӧм сьӧм пӧ абу жаль. Тӧдса ӧти­тор: Путин Володь спорттӧ радейтӧ да мурталӧ губернатор-юралысьяссӧ сы серти, кыдзи нималӧны спортсменъяс, налӧн котыръяс Россияса да войтыркостса ордйысьӧмъясын.

Уналаын тайӧс тӧдӧмӧн ӧдйӧ кыпӧдісны нималана спорткотыръяс: коксярӧн ворсысь «Мордовия» Саранскын, «Алания» Владикавказын, «Терек» Грозныйын, хоккейӧн ворсысь «Югра» Ханты-Мансийскын да с. в. Сӧмын сэтчӧс юралысьясыс котыръясыслы бӧрйӧмаӧсь бур нимъяс, найӧ индӧны сэтчӧс войтыр да му вылӧ. А вот миян республикаын зэв мисьтӧминик ним пуктӧмаӧсь, быттьӧ абу нин коми кывйын немтор мичаыс да кыпыдыс.

Тані бара миян некутшӧм патриотизм оз тыдав. Медся дойданаыс да гажтӧмыс дзик мӧдтор: юркарын спортӧн татшӧм ворсӧдчӧмыс оз ёнмӧд-содты республика­са олысьяслысь дзоньвидза­лунсӧ ни арлыдсӧ.