МЫЙӦН И ЫШНЯСЯН?

Россия — аслыспӧлӧс канму, миян унатор зэв ӧдйӧ вежсьӧ, сьӧдсянь еджыдӧ, ӧтарсянь мӧдарӧ. Либералъяслӧн ыджыдалан кадыс, ельциндырыс помасис. Путиндыр кадколастӧ вочасӧн пондісны ёнджыка сёрнитны патриотизм йылысь, Сӧвет кадся шедӧдӧмторъяссӧ да вермӧмъяссӧ нимкодясьӧмӧн бӧр асавны. Тайӧ и гӧгӧрвоана. Кольӧм кызь вонас некутшӧм ыджыд вермӧм эз вӧв да, мыйӧн и ышнясян?

Сӧмын бӧръя нёль вонас, и торйӧн нин таво, татшӧм ыджыд вермӧмыс лои. Россия дасьтіс да зэв бура нуӧдіс Сочиын тӧвся олимпиада. Кӧсйӧмыс, гӧгӧрвоана вӧлі, кутшӧм: бергӧдны бӧр да кыпӧдны Россиялысь бур нимсӧ медводз мусяр пасьтала. Та вылӧ Путин Володь эз нин жалит некутшӧм сьӧм. Сочиын миян Олимпиаданым лоӧма став татшӧм венласяна ворсӧмъясысь меддона. Но и мед, медводз нуӧдӧма лои да медуна медаль босьтісны россияса!

Сӧмын тай мыйсюрӧ оз-оз дай синмад пырӧ, нелючкиторйыс парскӧ.

Медтешкодьторйыс — роч кириллица анбур да рочногса нимъяс кедзовтӧм. Тӧдса ӧтитор: быд Олимпиадалӧн могыс и мӧд на эм — паськӧдны ордйысьӧм нуӧдысь канму, сэні олысь войтыр да культура йылысь тӧдӧмлун. Миян Россияын медшӧр каналан кывйыс роч. Но Олимпиада пасас Сочи карсӧ гижӧма мыйлакӧ латин шыпасӧн — Sochі, кык ногӧн, сувтсӧн дай мӧдар ног. Англия ногӧн пасйӧма и Россиялысь нимсӧ спортсмен паськӧмас да мукӧд став эмблемаас — Russіa, шуанног сертиыс кӧ, Раша.

А ӧд роч кириллица анбурыс зэв жӧ важ, лӧсьӧдӧма Симеон болгар сар дырйи 893–927-ӧд воясӧ, а Россияӧ вуджӧдӧма сюрс во сайын, кристиана эскӧмӧ Киевса Русьӧс пыртігӧн.

Дерт, ӧнія роч шыпасъясыс торъялӧны важсясьыс, но мыйла тайӧ культура озырлунсӧ ӧні ӧтдортісны? Россия нимсӧ тшӧтш колӧ эськӧ вӧлі гижны роч шыпасӧн, англия кывкӧд орччӧн, а бурджык сы водзын. Помнита, Мӧскуаын 1980 вося гожся Олимпиада дырйи СССР нимсӧ сӧмын роч шыпасӧн вӧлі гижӧма. Сэки некодлы юрас эз волы гижны ыджыд канмулысь нимсӧ йӧз кывйӧн, кодлыкӧ чесьтӧ уськӧдчӧмӧн.

Кывкӧртӧдыс татысь ясыд: ӧнія Россияса веськӧдлысьяс, кыдзи и дзоньнас роч кывъя йӧзкотырыс, роч кывсӧ оз вылӧ пуктыны. Тайӧ тыдалӧ и миян уличьясын, ӧтуввезйын, газет-журналса рекламаын. Быдлаын англия кывъя ним да цитата, тшӧкыдджыкасӧ латин анбурӧн гижӧмӧн. Татшӧм патриотизм артмӧ.

Сэк жӧ ставыс тайӧ инмӧ и миян коми кывлы, рочысь став татшӧм лӧптыс вуджӧ миянӧ. Со кӧть ӧти видлӧг неважӧнся «Йӧлӧга» газетысь: «Март медводдза лунӧ Сыктывкарын муніс «Scіence Slam» — наукаяслӧн ордйысьӧм. «Scіence Slam» — тайӧ войтыркостса проект, лӧсьӧдӧма наука уджъяс кокниа гӧгӧрвоӧдӧм могысь. Быд сёрнитысь-туялысьлы сетсьӧ дас минут гӧгӧрвоана висьтавны став йӧзлы, весигтӧ челядьлы, аслас удж йылысь». Англия кывйын slam-ыс вачкӧм, клопнитӧм, шуам, ӧдзӧсӧн. Мый нӧ сэсся, тайӧ кывтэчассӧ эз нин позь роч либӧ коми ног шуны? Дерт, позис! Патриотизмыс миян, тыдалӧ, оз тырмы либӧ абу нин...