МӦВПЫШТНЫ КӦ БУРДЖЫКА
Коми йӧз чужан кывсӧ медтшӧкыда кывлӧны, дерт жӧ, гортас да матыссаяс пӧвстын. Карын олысьяс комитӧ удж выланыс да уличын оз нин кывлыны. Кольӧ кывзыны комиӧн радио, видзӧдны телеуджтасъяс да лыддьыны ас кывйӧн газет-журнал. Кутшӧм кывйӧн жӧ юргӧ теле-радио, петӧ йӧзӧдӧмтор?
Дерт, лёкӧдны ӧтырышйӧн став кывсӧ он вермы, но и помтӧг ошкыны оз артмы. Мый нӧ шыбитчӧ синмӧ? Лыддьӧдлыны позяс зэв унатор, но медся майшӧдланаыс, ме ногӧн, важ нэмӧвӧйся коми кывворсӧ кедзовтӧм. Мӧд кывйӧн кӧ, медся кокньыд туйӧд мунӧм — роч кывъяс пыртӧм. Абу ӧд гусятор: уна уджтас дасьтігӧн да стаття гижигӧн журналистъяс рочысь вуджӧдӧны ӧтуввезйысь, быдсяма пресс-релиз да с. в. Вайӧдам некымын видлӧг.
Пуксис гожӧм. Сійӧ вайис эз сӧмын помтӧм гажлун, но и майшасянторъяс. На пиысь ӧти — курччасьысь гаг, кодӧс теле-радиоын век нимтӧны роч кыв пыртӧмӧн — клещ. Шуанног сертиыс эськӧ комиӧдныджык позьӧ — клеш. А позьӧ-ӧ коми кыв аддзыны? Вӧлӧмкӧ, позьӧ, ӧд лунвывса коми сёрнисикасъясын да перым-коми диалектъясын эм курччасьысь гагйӧс пасъян торъя кыв — льӧмтой. Войдӧр льӧмтойясыс тшӧтш курччасьлӧмаӧсь, но сэки найӧ абу на вуджӧдлӧмаӧсь энцефалит да мукӧд лёк висьӧм.
Гожӧмнас миян эм и мӧд зэв дӧзмӧдчантор — сотысь яр быдмӧг, кодӧс теле-радиоын нимтӧны роч борщевик кывйӧн. Дерт, ыджыда быдмысь быдмӧг нимыс пыраліс коми кывйӧ рочысь, сӧмын колӧ эськӧ тӧдны тшӧтш сотысьторсӧ комиӧн шуӧмъяссӧ. Геннадий Юшковӧс тайӧ лёк быдмӧгыс тшӧтш ёна дӧнзьӧдлӧма, да ӧти висьтын зэв аслыснога сійӧс нимтӧма, пыртӧма адгум кыв. Сэні ӧтлаӧдӧма лёклун петкӧдлан ад да гум юкӧдъяс. Кывсӧ гижысьыс артмӧдӧма азьгум серти. Важысянь ӧд комияс вӧдитчылӧмаӧсь тайӧ шом сетан быдмӧгнас, пулӧмаӧсь сыысь азя шыд.
Россияса юралысь Путин Володь зэв ёна радейтӧ спорт, мый-мый, а сы вылӧ сьӧмсӧ оз жалит, вичмӧдӧ урӧвйӧ. Та вӧсна вель уна юӧр пондісны сетны теле- да радиоуджтасъясын уна сикас ордйысьӧм, венласьӧм йылысь. Мукӧддырйиыс синмад шыбитчӧ бара жӧ рочысь кывворӧн вывтіасьӧм, шуам, «Талун» уджтасысь кывлі со мый: «Гонкаяс бӧрын спортсменъяс сетісны миянлы интервью». Коми йӧз важысянь нин котралӧмӧн, уялӧмӧн, лызьӧн панъясьлісны, та понда гонка пыдди зэв кокниа позьӧ шуны панъясьӧм.
Дерт, позьӧ ёнджыка вӧдитчыны и выль кывъясӧн, кодъяс гӧгӧрвоана пасйӧны зэв унатор. Шуам, старт да финиш кывъясӧн пыдди позяс кокниа вӧдитчыны водзтшупӧд да помтшупӧд неологизмъясӧн. Позьӧ и спорт сикасъяссӧ ёна комиӧнджык вайӧдны: ичӧт путбол, кокни атлетика, пертаса уялӧм (синхроннӧя уялӧм), турунвыв коккей, пызанвыв теннис, мача коккей да мукӧд. Чайта, быд коми кыв тӧдысь морт тайӧ кывтэчасъяссӧ кокниа гӧгӧрвоас да шуас: «Со ӧд кутшӧм лючки-бура да коми ног вайӧдӧмаӧсь!»
