ИЛЛЯ ВАСЬ ЙЫЛЫСЬ НЕБӦГ

Дзик на неважӧн Сыктывкарса канму университетын вӧлі йӧзӧдӧма выль ыджыд небӧг быдӧнлы тӧдса коми туялысь да кывбуралысь, профессор Илля Вась йылысь. Нимыс «Финно-угровед Василий Лыткин (Илля Вась)». Дасьтӧма сійӧс культурологияса доктор Майя Ивановна Бурлыкина, коді университетын уджалӧ сійӧс панӧмсяньыс да уна во веськӧдлӧ сэтчӧс Коми муса йӧзӧс велӧдан история музейӧн.

Тайӧ музеяс чукӧртӧма нималана коми туялысьяс да велӧдысьяс йылысь зэв уна кабала да небӧг. Казьтышта татчӧ, 2007-ӧд воын на М. И. Бурлыкиналӧн петавліс нин ыджыд небӧг Алексей Семёнович Сидоров йылысь, кодӧс бурӧн донъялӧны коми кыв велӧдысьяс да университетын велӧдчысьяс.

А. С. Сидоров йылысь небӧгын моз жӧ гижысьыс шӧр юрподув пыддиыс босьтӧма ыджыд туялысьлысь олан туйсӧ: челядьдырсӧ, Тотьмаын велӧдчӧмсӧ, Канкарын студенталӧмсӧ, Финляндияӧ ветлӧмсӧ, дзескыдінӧ пуксьӧдлӧмсӧ да с. в. Зэв уна документ вылӧ подуласьӧмӧн Майя Ивановна стӧча серпасалӧ Тентюковысь петлӧм енбиа том мортлысь быдмӧм-туӧмсӧ да водзӧ зэв сьӧкыд олӧмсӧ, помтӧм уджсӧ.

Шемӧстӧ миянӧс Илля Васьлӧн морт сямыс: тышкасьлӧма сар вӧсна да повтӧмлунысь ӧшӧдӧмаӧсь морӧсас Георгийлысь крест (та йылысь оз унаӧн и тӧдны), аскост тышын веськавлӧма германечьяслы пленӧ, велӧдчӧма Мӧскуаын, Суомиын, Эстонияын, Венгрияын да Германияын, сэсся пукавлӧма ГУЛАГ-са дзескыдінын да Айму вӧсна Ыджыд тыш воясӧ лоӧма наукаса кандидатӧн, докторӧн, уна во уджалӧма канму юркарысь ылын (Кинешмаын, Оренбургын, Рязаньын) да вӧлисти сэсся пондӧма веськӧдлыны СССР-са наукаяс академиялӧн Кыв туялан институтын финн-угор кывъяс юкӧнӧн. А такӧд тшӧтш гижлӧма коми кывбуръяс, мойдъяс, унатор комиӧдлӧма мукӧд кыв вылысь.

Унатор йылысь висьталӧны тшӧтш небӧгӧ вайӧдӧм фотосерпасъяс да помас нин зэв колана лыддьӧгъяс (мый Илля Васьыс гижлӧма, мый гижӧма сы йылысь, олӧмсьыс дженьыд кадпас-хроника, сылы сетӧм наградаяс). Шензьӧдӧ тшӧтш, мый В. И. Лыткинӧс кутшӧмкӧ помкаяс вӧсна абу и бӧрйылӧмаӧсь Наукаяс академияса член-корреспондентӧ, сылы абу и сетлӧмаӧсь РСФСР-са наукаын нимйӧза уджалысьлысь ним. Тыдалӧ, енбиа коми туялысьтӧ гусьӧн мустӧмтысьыс тшӧтш Мӧскуаас унакодь вӧлӧма. И мӧдарӧ, Коми АССР-са веськӧдлан котырсянь Илля Васьлы вичмӧма уна тӧжд.

Небӧгсӧ лыддян кокниа, сэтчӧ вайӧдӧма тшӧтш Илля Васьлысь уна кывбур юкӧн да цитата, а тайӧ вӧчӧ гижӧдсӧ ловъяӧн...