МӦДАРА КЫВКУД
Колян во помын Финляндияса Хельсинки карын петӧма
Лӧсьӧдӧмаӧсь сійӧс Турку университетса доцент, филологияса доктор Ёрма Луутонэн да Сыктывкарын бура тӧдса морт Ӧньӧ Лав.
Аслыспӧлӧслуныс татшӧм кывкудйыслӧн ыджыд: сэні став кывсӧ пукталӧма анбур серти, но сӧмын кыв помсяньыс. Тайӧ сетӧ позянлун туявны коми гижӧд кывйын кыв артмӧмсӧ, кывпомся шыкудсӧ, видзӧдлыны торъя суффиксъяслысь бергалӧмсӧ да уна мукӧдтор.
Татшӧм кывкуднас позяс бура вӧдитчыны тшӧтш школаын да вылыс велӧдчанінын коми кыв велӧдігӧн.
Уна кывйысь (англия, роч, тотара, эрзя-мордва, мари) татшӧм мӧдара кывкудъяссӧ вӧчлісны нин, миян кывйысь татшӧмыс медводдза. Авторъясыс пыртӧмаӧсь кывворсӧ 20 кывчукӧрысь, но медшӧр ӧшмӧсыс вӧлӧма 2000 воын Сыктывкарын йӧзӧдлӧм «Коми-роч кывчукӧр» (авторъясыс Л. М. Безносикова, Е. А. Айбабина, Р. И. Коснырева). Кывкудйыс пансьӧ а кывйитӧссянь да помасьӧ вир-яя да банъяя кывъясӧн.
Татшӧм ыджыд кывкуд йӧзӧдӧм вылӧ сьӧмсӧ лишӧдӧма Суоми муысь финн-йӧгра котыр, коді сё во сайӧ нин уджалӧ сьӧммӧдысьяслӧн кошт вылын да лэдзӧ став урал кывйысь туялан литература да кывкудъяс.
Медыджыд пайыс тайӧ удж панӧмас, дерт, Турку университетса Волгаберд кывъяс велӧдан шӧринлӧн, сэтчӧс веськӧдлысьяс профессор Сиркка Сааринэнлӧн да доцент Ёрма Луутонэнлӧн, сэтчӧс компутер уджтасалысьяслӧн. Суомиысь Коми муӧ сьӧм босьттӧг лишӧдӧмаӧсь кызь сайӧ татшӧм кывкуд, медводз небӧгкудъясӧ да коми кыв велӧдан да туялан шӧринъясӧ.
