ТЫРИС ЭСЬКӦ 70
Кыдзкӧ тӧдлытӧг лэбӧ кадыс, со и шонъянӧй йӧзлысь пасйывтӧм юбилейяс кольӧны. На пиысь ӧти — бур морт, миян велӧдысь да вӧвлӧм уджъёрт Владимир Александрович Ляшев. Ловъя кӧ ӧнӧдз вӧлі сылы сизимдас ар на сӧмын тырис.
Чужлӧма сійӧ 1942 вося урасьӧм тӧлысь 7 лунӧ Визин сиктсӧветувса Кольёль неыджыд грездын. 1960 воын помалӧма Визинса шӧр школа. Сійӧ жӧ воас пырӧма велӧдчыны Коми пединститутӧ, коми кыв да литература юкӧнӧ. 1964 воын босьтӧма диплом.
Том велӧдысь медводз уджалыштӧ Кӧрткерӧс районын Позтыкерӧсса кӧкъямыс класса школаын. Сэсся том мортӧс шуӧмаӧсь босьтны армияӧ. Но дзик пырсӧ абу на мӧдӧдӧмаӧсь, Сыктыв районса Горьковскӧй школаын велӧдысьыс абу тырмӧма да, уджалыштӧма на сэні. Та бӧрын В. А. Ляшев служитӧма армияын, служба вылысь бӧр воӧма Комиӧ 1965 вося августын. Недыр велӧдӧма Сыктывдінын Пычимса школаын, сэсся инструкторалӧма ВЛКСМ Коми обкомын. Та бӧрын бара школа — 1967 восянь уджалӧма Сыктывдінса Сёськаын.
Чужан коми кыв дорӧ ыджыд интересыс вайӧдӧ сійӧс аспирантураӧ. 1971 восянь В. А. Ляшев велӧдчӧ Канкарын Кыв туялан институтын, гижӧ кандидат ним вылӧ диссертация нималана коми туялысь да кывбуралысь, профессор Илля Васьлӧн (В. И. Лыткинлӧн) юрнуӧдӧм улын. Уджыслысь «
1977 вося йирым тӧлысьын Эстонияын Тарту карса университетын В. А. Ляшев дорйӧма кандидат ним вылӧ диссертация. Сэки сійӧ уджалӧма нин Кыв, литература да история институтын. 1987 воын Владимир Александрович вуджӧма велӧдысьяслысь тӧдӧмлун кыпӧдан институтӧ.
Владимир Александрович виччысьтӧг кувсис 1999 вося косму тӧлысьӧ 57 арӧсӧн.
В. А. Ляшев гижис 60 сайӧ удж, на лыдын некымын небӧг да кывчукӧр. Сійӧ вӧлі коми сёрнисикасъяс тӧдчана туялысьӧн, кыв велӧдан методикаын, коми кыввор туялӧмын бур специалистӧн. Сійӧ гӧгӧртӧма экспедицияӧн ставнас Коми мусӧ, торйӧн нин зільӧма Емва вожын. Ӧттшӧтш сійӧ лыддьывлӧма лекцияяс Сыктывкарса, Ижкарса, Будапештса университетъясын, Коми пединститутын, школаясын. Лыддьывлӧма докладъяс уна конференция да конгресс дырйи. Сылы сетлӧмаӧсь «Йӧзӧс велӧдӧмын зэв бур уджалысь», «Уджвывса ветеран» нимъяс, пасйӧмаӧсь Коми АССР-ын Вылыс Сӧветса президиумлӧн нимӧдана кабала.
Тайӧ кос юӧр дорас, дерт, колӧ мыйсюрӧ содтыштны. Владимир Александрович, позьӧ шуны, вӧлі тшӧтш менам туясян уджын юрнуӧдысьӧн. Университетын велӧдчигӧн медводдза курсын сійӧ волывліс миян группаӧ да ворсліс баянӧн. Сэки кутшӧмсюрӧ частушка сяма сьыланторъяс велӧдлім. Сэсся миянлы торъя курс да синтаксис йылысь лыддигӧн сійӧ зэв пыдди пуктӧмӧн волысис студентъяскӧд, асьсӧ вылӧ эз пуктыв. Коймӧд курсын сійӧ веськӧдліс менам уджӧн да сетліс уна литература. Весиг мыйсюрӧ ачыс на гижліс водзкывъяс. Витӧд курсын аспирантураӧ менам пыригӧн Владимир Александрович отсаліс мыйӧн вермис: уна литература вӧзйыліс, аслас небӧгкудйысь коланаторъяс сетавліс. Тартуын менам велӧдчигӧн век письмӧасим, и сы йылысь менам колис сӧмын бур казьтылӧм...
Артмис сідзи, мый сылы ковмис мунны Кыв, литература да история институтысь уджавны мӧдлаӧ, сэкся нимӧн кӧ, ИУУ-ӧ. Лои сійӧ методист, туялан нырвизьыс кизьӧрмис педагогикаӧн. Тайӧ воськолыс сылӧн лои шыбӧля, вочасӧн Владимир Александрович кӧдзаліс туясьӧмысь. Институтысь мунтӧдзыс сійӧ козьналіс меным вель уна колана небӧг. В. А. Ляшев отсавліс эз сӧмын меным, но и став томджык туялысьыслы.
Бӧръя воясас сыкӧд аддзысьлім шоча, миян институтӧ оз вӧлі ёнасӧ пыравлы да. Оліс ӧтуволанінын. Сэні и суӧма рӧкыс, сьӧлӧмыс висьмӧма да сувтӧма.
Бӧръя туйӧ колльӧднысӧ воліс зэв уна йӧз, дзебисны шонъянӧйӧс гӧтырыслӧн чужан Сёська сиктса шойнаӧ, пожӧма ягӧ.
Жаль, но емваса сёрнисикас йылысь сылӧн зэв бур кандидат уджыс ӧнӧдз йӧзӧдтӧм, куйлӧ Коми туялан шӧринса архивын.
