СІДЗКӦ, КОЛХОЗНИК!
Митрейлӧн ордпуас зэв ёсь кывъя йӧз вӧлӧмаӧсь, на пиысь ӧнӧдз на гаравлӧны Сирпи Ӧсипӧс. Уна тешкодьтор вӧвлӧма сылӧн олӧмын. Ӧтиӧс со казьтышта...
Айму вӧсна Ыджыд тыш вылысь воӧм Сирпи Осип во сайӧ мырсьӧма колхозын, а сэсся сёрнитчӧма уджавны вӧралысьӧн. Дӧнзьӧма, вӧлӧм, трудоденьяс вӧснаыд пӧсьсӧ кисьтны, дай вит челядьӧс на мый вылӧ кӧ колӧ вердны-быдтыны. Нина — медыджыд нылыс — буретш лэччӧма карӧ велӧдчыны пединститутын. Бур паськӧмтӧг. И со арнас Осип пӧпуттьӧ машина-вӧлӧн лэччӧдӧма Сыктывкарӧ вузӧс вылӧ куим дозмӧр, нылыслы — кос яй да картупель. Базар вылын озырджык йӧзыд ӧдйӧ и ньӧбӧмаӧсь пӧткасӧ. Сьӧмсӧ нуӧма Нинукыслы. Сӧмын ӧтуволанінсьыс нывсӧ абу аддзӧма да ковмӧма мунны велӧдчанінсьыс корсьны, ӧд рытъявылыс Осип лӧсьӧдчӧма бӧр сиктӧ кайны.
Воӧма пединститутас да пырӧма аудиторияӧ. Сэні буретш нылыслӧн группаыс мортлысь анатомия вӧлӧм велӧдӧ. Осип пуксьӧма медбӧръя лабичас да пондӧма сюся кывзыны велӧдысьсӧ. Профессор индалӧма скелет вылӧ да мыйкӧ сюся гӧгӧрвоӧдӧма. Осип друг чеччӧма:
— А позьӧ-ӧ юавны, кутшӧм сословиеысь тайӧ мортыс петлӧма? — да индӧма голякылысь лыяслань.
— Ӧнія наука некыдзи оз вермы вочавидзны та вылӧ, ӧд быд мортлӧн, кӧть кутшӧм сословиеысь сійӧ эз петавлы, лыкудйыс ӧткодь, оз торъяв, — лӧсьӧдыштіс ӧчкисӧ велӧдысьыс.
— Абу тадз, профессор ёрт, — чилӧстӧма Осип. — Ме стӧча тӧда тайӧ мортыслысь сословиесӧ.
— Но, сідзкӧ, висьтав, кутшӧм сословиеысь вӧлӧма тайӧ мортыс? — тешитчӧмпырысь нин юалӧма профессорыд.
— Висьтала, — чукыртӧма плешсӧ Осип. — Тайӧ куш лыа мортыс — колхозник. Асьныд видзӧдлӧй: яйыс абу, — сідзкӧ, яй поставка сдайтӧма, кучикыс абу — кучик поставка сдайтӧма, юрсиыс абу — юрси поставка... Со и кольӧма лы кежсьыс!
Та бӧрын студентъяс шызьӧмаӧсь. Нина котӧртӧма батьыс дорӧ да кыскӧма сійӧс сой пӧлӧдыс ывлаӧ: мун пӧ ӧдйӧджык гортад кай, эн нин петкӧдчы тан, погонаыс со мыйта ветлӧдлӧ!..
Сэки айловӧс Енмыс видзӧма — некод дзескыдінад абу пуксьӧдӧма. Сӧмын неуна сёрӧнджык, 50-ӧд воясӧ, ёсь кыв вӧснаыс Сирпи Ӧсипӧс век жӧ йӧршитлӧмаӧсь тюрьмаӧ. Но тайӧ дзик мӧд висьталантор нин.
