СТАВСӦ РОЧЫСЬ БОСЬТНЫ?

Зэв сюся лыдди «Коми муын» менам неважӧнся ӧти гижӧд вылӧ Василий Сажинлысь видзӧдлассӧ. Абу воӧма сылы сьӧлӧм вылас выльӧн пырысь ӧтуввез кыв, шуӧ, оз пӧ сійӧ ков коми йӧзлы, уна мукӧд кывйын бергалӧ нин англия кывйысь босьтӧм интернет. Водзӧ гижысьыс веськыда шуӧма, оз пӧ ков сӧвмӧдны ас коми кывворсӧ, тырмымӧн лоӧ ставсӧ рочысь босьтны, сэки пӧ озырджыкӧсь лоам. Татшӧм видзӧдлассӧ, ме серти, некыдзи абу подулалӧма да сійӧ уськӧдӧ миян озыр кывнымлысь донсӧ дай чужан войтырӧс коньӧрӧ пуктӧ, ыштӧдӧ лӧньны-падмӧдчыны.

Василий Сажинлысь мӧвпсӧ ачыс олӧмыс пузувтіс: бергалӧ кӧ нин ӧтуввез кыв газет-журналъясын да радио-телеуджтасъясын, йӧз сёрниын, сідзкӧ, сійӧ колана. Ӧтуввез кыв — тайӧ англия іnternet кывйысь веськыд калька, кыв юкӧнъясыслӧн вежӧртасъясыс дзик ӧткодьӧсь, ӧтувъя пасъянторйыс ӧти. Василий Сажин серти кӧ, оз ков йӧршитчыны дзик ӧти комиӧ, колӧ сідз шусяна интернационализмъяссӧ кольны вежлавтӧг, кыдзи роч кывйын. Тадзисӧ Василий Сажин висьталӧ сӧмын роч кыв тӧдӧм подув вылын, мукӧд кыв тӧд вылӧ босьттӧг. Василийлы да «Коми му» лыддьысьяслы тӧдӧмӧн вайӧда таблица, кытчӧ пыртӧма нёль лексемалы (история, метро, литература, музыка) мукӧд кывъясын весьтасъяс.

рочын

история

метро

литература

музыка

англияын

history

undeground subway

literature

music

немечын

Geschichte

Untergrund-bahn U-Bahn

Literatur

Musik

суомиын

historia

maanalainen

kirjallisuus

soitto musiikki

венгрын

tӧrtenet

metro

irodalom

zene

эстын

ajalugu

allmaaraudtee

kirjandus

muusika

комиын

важвылӧм

мупытштуй

литература

шылад

Кыдзи тыдалӧ, уна кывйын эмӧсь ас подув вылын артмӧдӧмторъяс, абу латин-грек важ кыввужъяяс. Шуам, музыка кывлы аслыссяма торъялан кывъяс эмӧсь венгр да коми кывъясын, метролы — англия, немеч, суоми, эст, венгр да коми кывъясын. Сідзкӧ, Василий Сажинӧн юрсьыс босьтӧм оланпасыс немся оз уджав, быд кыв аслыспӧлӧс да зільӧ озырмӧдны кывворсӧ, медым сёрнитысьыс бура гӧгӧрвоис кывъяслысь вежӧртассӧ. Коми кывным тшӧтш мунӧ татшӧм туйӧд, вочасӧн озырмӧ-паськӧдчӧ.

Компьютеркӧд йитчӧм терминология сідзжӧ сӧвмӧма вель бура став индӧм кывъяс, комиысь кындзи. Сӧвмӧдны сійӧс — миян ыджыд мог. Вӧзъя Василий Сажинлы водзӧ гижӧдъяссӧ дасьтігӧн петкӧдлыны сьӧлӧмкылӧмсӧ да чужан кыв вӧсна майшасьӧмсӧ стӧч тӧдӧмлунъяс вылӧ мыджсьӧмӧн. Медым эз нин ло ылӧдлӧма «Коми му» лыддьысьясӧс.