ТЕАТРЫН ПЕМЫД ДА КӦДЗЫД
Шензьӧмӧн лыдди «Чушканзі» журналса тавося медводдза номерысь Анжелика Елфимовалысь гижӧдсӧ сы йылысь, мый быд вося «Василей» гаж дырйиыс Кулӧмдін сиктса клубсӧ шонтыны оз вермыны да та вӧсна йӧзыс пасьӧн-шапкаӧн пукалӧны. А сэтчӧ быд во волывлӧ республикаса Юралысь да сы гӧгӧрса «кытшыс». И тадзи пӧ овлӧ быд во — век кынмӧны йӧзыс.
Ылӧдз сэсся оз нин ков мунны — и республикаса юркарын дзик ӧти коми театрын — шылада-драмааын — лоӧма пемыд дай кӧдзыд. Он эскӧй? А збыль тадзи и эм.
Январь 30 лунӧ ветлі сэтчӧ «Ясӧвӧй» спектакль видзӧдны. Ачыс петкӧдланторйыс воис сьӧлӧм вылӧ: артистъяс ворсісны зэв бура, сёрнитісны изьватас ногӧн, сьылісны-йӧктісны мичаа вурӧм паськӧмъясӧн. «Ясӧвӧй» спектакль мыйӧнкӧ мунӧ «Калевалалань», изьва-колваса эпос серти пуктӧма да. Шыладыс ӧнія сяма да та вӧсна ёна кажитчӧ томуловлы.
Сӧмын унатор майшӧдліс залас пыригӧн да сэтысь петігӧн. Уналаын нин гижлісны, Коми профсоюзъяслӧн федерацияӧн веськӧдлысь Дмитрий Лукашенко пӧ дзескӧдӧ вужвойтырлысь шылада-драмаа театрсӧ, ӧтарӧ содтӧ кӧртымалан сьӧмсӧ пӧрччысянінӧ да залӧ пырӧмысь. Пыраніныс да фойеыс мыйлакӧ профсоюз киын лоӧма. Январь 30 лунся рытӧ фойеыс вӧлі дзик пемыд да кӧдзыд — дугӧдӧмаӧсь ломтыны да кусӧдӧмаӧсь бисӧ. Тупкӧмаӧсь весиг асмогасянінӧ туйсӧ, розеткаас биыс абу да буфетыс оз уджав. Касса дорас сувтӧдӧмаӧсь ӧти лампа да сійӧн и тыдыштӧ вӧлі. Бур кӧть, видзӧдан залсӧ ломтӧны да сэні пукавнысӧ позис на. Но ӧд кӧдзыдыс фойесьыс пырӧ, да та вӧсна ковмис йӧжгылясьны.
Со татчӧдз воис миян культуралӧн сӧвмӧмыс — коми театрӧс дзескӧдӧмӧдз. Быттьӧкӧ помкаыс сьӧмын, Дмитрий Лукашенко кӧсйӧ гӧлиник театр тшӧт весьтӧ нажӧвитчыны, асьсӧ олигарх туйӧ пуктыштӧ. А, гашкӧ, тайӧс тӧдӧмӧн вӧчӧма лои, медым дзик ӧти тырвыйӧ коми театрсӧ коктӧммӧдны, сэтчӧ ветлысьсӧ падмӧдны-повзьӧдны? Колӧ, дерт, пыкны шылада-драмаа театрнымӧс. Сӧмын кыдзи? Медбур туй — ветлыны сэтчӧ видзӧдны коми петкӧдланторъяс, медым ставӧн аддзисны: коми йӧз оз повзьыны кӧдзыдысь-пемыдысь, сетӧны артистъяслы лачаа мыджӧд, ёнмӧдӧны налысь ловнысӧ.
