АБУ ВАРОВ, А СЬЫЛЫСЬ

Бӧръя воясӧ республикаса олысьяс вермӧны кывзыны «Коми йӧзкостса радио», и тайӧ зэв бур. Позьӧ шуны, торъя коми радиоканал лои. Луннас, рытнас да асывнас позьӧ кывзыны ас кывъя уджтасъяс да сьыланъяс. Торйӧн нин кивыв тайӧс вӧчны шойччан лунъясӧ, сэки ӧд «Коми горын» ни «Юрганын» коми горыс мыйлакӧ оз юргы, ӧткымын дженьыдик уджтасысь кындзи. Чайтӧны, коми йӧзыслы сэки ас кывъя уджтасъясыс оз ковны. И бур, мый позьӧ ӧні кывзыны коми сьыланъяс, нимкодясьны мича шыладӧн да сьылысьяслӧн мыла горӧн.

Сӧмын колӧ эськӧ, мед татшӧм радиоыс кыліс быдлаын республика пасьтала, а эз сӧмын сутуга пыр паськалан радиовезйӧд разав. Мед кывзыны позис тшӧтш туйын, вӧр-ваӧ петаліг, ывлаын шойччиг-уджаліг. Мыйлакӧ весиг Перым-Коми кытшын ас кывъя радиоыс паськалӧ FM радиогыясӧд, а миян збыльысь озыр республиканым тайӧс вӧчны оз вермы. Марий Эл республикаын асланыс радиоканал уджалӧ FM гыясӧд жӧ.

Миян радиоканалын зільӧны том йӧз. Уджтас нуӧдысьясыс кызвыннас тӧрытъя студентъяс, найӧ зільӧны ышӧдны миянӧс кывзыны налысь уджтасъяссӧ. Ошкӧны асьнысӧ тадзи: «Коми йӧзкостса радио — медся варов радио». Тайӧс кывзынысӧ, дерт, нимкодь, сӧмын таӧ он на ёна эскы, ӧд буретш варовлуныс оз зэв тыдав. Сёрнитан уджтасъясыс зэв дженьыдӧсь (3–4 минут кымын) да сёрни кывзӧмас он на и ёнасӧ ылав. Бурджык ошкыны асьнысӧ мӧд ног — медся сьылысь радио.

И збыль: унджык кадсӧ юргӧны коми сьыланкывъяс. Дерт, тайӧ зэв бур. Сӧмын окота эськӧ и тырвыйӧ бура дасьтӧм да кузьджык уджтасъяс кывзыны, шуам, сійӧ жӧ сьылысьяскӧд да шылад тэчысьяскӧд сёрнияс. Содта татчӧ ӧтитор: кызвын сьыланкыв водзвылас некутшӧм юӧр абу ни сьылысь, ни сьыланкыв гижысь йывсьыс. Дерт, найӧс пыдди пуктӧм вӧсна нин колӧ сетны колана юӧръяссӧ, ӧд бӧръя каднас енбиа мыйта выль том морт петкӧдчис, и найӧс колӧ тшӧтш нимӧдны. Ог нин индывлӧй сӧмын Лидия Логинова вылӧ. Выль коми кодзувъяссӧ колӧ ӧзтыны!

Йӧзкостса радиосалы варовлунсӧ колӧ, ме серти, ёна содтыны, подулавны культура, политика, спорт, вӧралӧм, чери кыйӧм, йӧзӧс велӧдӧм да туялӧм йылысь уджтасъяс. Тӧдса ӧд: «Коми гор» радиоын комиӧн сёрнитан кадыс ёна этшаджык, а рытъяснас чужан кыв вылас радиостанцияыс оз нин горав. Сӧмын, дерт, та могысь колӧ ёна содтыны каналын уджалысь лыдсӧ. Медым эз сёрнитчан пыр кодӧссюрӧ юасьны, а ветлісны районъясті, корлісны гижавны уджтасъяссӧ лючки студияӧ. Тайӧ могсӧ олӧмӧ пӧртӧм вылас, дерт, колӧ вель уна сьӧм. Чайта, республикаса веськӧдлан котырлы колӧ оз сӧмын «Белкомуръяс» вӧсна «висьны», а медводз вужвойтыр вӧсна тӧждысьны.

Торйӧн окота пасйыштны «медся варов радиоса» коми кыв йылысь. Юргӧ миянлы 2009 вося декабрь 8 лун талунъя кыв, журналистъяс кыдзи вермӧны зільӧны пӧльыштны асланыс уджтасъясас ӧнія кадся выль ру: пыртӧны вылькывъяс (изэрд, каналан, оланпас да с. в.), зільӧны лӧсьӧдны аслыссикас кывтэчасъяс. Сӧмын майшӧдлӧ кыктор: ӧти-кӧ, том йӧзыс сёрнитӧны вывті нин тэрыба, ньылалыштӧны кыв помъяссӧ, весигтӧ корсюрӧ сьӧкыд гӧгӧрвоны шуӧмторсӧ. Мӧд-кӧ, юӧр сетысьяс тшӧкыда кывйысь кывйӧ вуджӧдӧны роч кывйысь зумыд кывтэчасъяссӧ сідзи, мый найӧ оз лӧсявны коми кывлӧн оланпасъяслы, пытшкӧсса вежӧрыслы. Шуам, тшӧкыда кывлам «Кольччӧй миянкӧд!» шуӧм. Коми мортыд тайӧс гӧгӧрвоас дзик веськыда — колӧ радиоас пырны, воны котӧрӧн редакцияас да сэтчӧс йӧзыскӧд кольччыны ӧти вежӧсас. Гӧгӧрвоана ӧд: тайӧ рочысь «Оставайтесь с нами!» шуӧмсӧ комиӧдӧм. Ёна комиӧнджыка эськӧ юргӧ вежӧртас сертиыс мӧд ног вуджӧдӧм — «Водзӧ кывзӧй миянӧс!»

Сэсся вель уна босьтӧм кыв пыдди позьӧ ӧд аддзыны коми весьтасъяс. Шуам, уджтас нуӧдысьяс быд асыв сиӧны кывзысьяслы «бур настроение». Бӧръя кыв пыддиыс позьӧ вӧдитчыны «аскылӧм» да «ловру» кывъясӧн.

Ӧнія кадлы зэв лӧсяланатор — юӧртны йӧзыслы водзӧ лоанаторъяссӧ гороскоп серти, ӧд унаӧн эскӧны кодзувъяслы да пельсӧ чошкӧдӧмӧн кывзӧны асланыс енэжпас серти лӧсяланаторъяссӧ. Ме эськӧ талы ог эскы да ог и кывзы, но пельыд век крукасьӧ рочӧн сетан енэжпас нимъясас (дева, весы, рыбы, овен да с. в.). Дзик тадзи жӧ, роч ногӧн, гороскопъяссӧ йӧзӧдӧ и «Йӧлӧга» газет. Чайта, тадзи вӧчны оз ков, ӧд и рочас тайӧ енэжпасъясыслысь нимъяссӧ тшӧтш вуджӧдӧма асыввыв кывъясысь. Синтӧ кӧ чӧвтан англия, немеч, суоми, мари, удмурт, эст кывъя газет-журналъясӧ да кывзыштан тайӧ кывъяса радио, пыр жӧ и казялан дзик мӧд серпас — сэні став енэжпассӧ сетӧны ас кывнас, сійӧс тадзи пыдди пуктӧмӧн. Видлӧг вылӧ позьӧ вайӧдны асыввыв гороскопысь енэжпас нимъяссӧ роч, суоми, удмурт да коми кывйӧн.

Роч кывйын

Овен Телец Близнецы Рак Лев Дева Весы Скорпион Стрелец Козерог Водолей Рыбы

Суоми кывйын Oіnas Harka Kaksoset Rapu Lejona Neіtsyt Vaaka Skorpіonі Jousіmіes Kaurіs Vesіmіes Kalat

Удмурт кывйын Така Ош Кыктоос Кисло-кусло Лев Нылмурт Весъёс Скорпион Ыбылйськись Сюро кеч Ву кисьтась Чорыгъёс

Коми кывйын Мегӧ / Меж Бычӧ / Ӧш Кыка / Двӧйни Рак Лев Ныв Вески Скорпион Лыйсьысь Сюра айкӧза Ва кисьтысь Чери

Бӧръяяссӧ ассянь вӧзъя пыртӧдны «Коми йӧзкостса радиоӧ», мед быд кывзысь аддзас чужан кывйыслысь позянлунъяссӧ. А сідзжӧ сиа том журналистъяслы коми кыв сӧвмӧдан да паськӧдан уджын водзӧ гырысь вермӧмъяс.