БУР ВЕЖСЬӦМӦДЗЫС ЫЛЫН
Коми кывлӧн воӧ унджык кутісны сёрнитны эз чужан кыв, а сӧмын тайӧ во йывсьыс, быттьӧкӧ мукӧдас вужвойтырлӧн кыв вӧсна тӧждыс оз нин сэсся ков.
Видзӧдлыны кӧ радио да телевидение уджтасъяссӧ, буретш таво гырысь вежсьӧмъясыс эз лоны, он кӧ босьт тӧд вылӧ Коми Республикаса телеканаллысь ним вежӧмсӧ да сэтчӧ выль веськӧдлысьӧс индӧмсӧ. «Юрган» нимысь, дерт, вужвойтырлы кутшӧмакӧ нимкодь, сӧмын миян тайӧ нимкодьлуныс ӧдйӧ ныжмӧ, кыдзи коркӧ «Коми горысь». Ӧд сэки уналы жӧ сьӧлӧм вылас воис татшӧм нимыс.
Ӧні «Коми горын» серпасыс гажтӧм, коми уджтасыс зэв этша, асъя «Ас му вылын» петас кындзи немтор абу. Но ӧд сійӧс петкӧдлӧны 8 час 45 минутсянь, буретш сэки унджыкыс удж вылӧ да велӧдчанінӧ тэрмасьӧны.
Видзӧдлам сюсьджыка выльторъяс сетӧмсӧ. «Коми горын» комиӧн «Вести-Коми» уджтас петавлӧ йӧзыслы медся лӧсявтӧм кадӧ — асывнас 23 минут да 17 час 25 минутын. Рытъя коми выльторъяс сэсся абуӧсь. Татчӧ колӧ пасйыны буретш прайм-тайм йылысь. Англия кывйысь тайӧ кывтэчаснас пасйӧны йӧзӧн видзӧдан-кывзан медбур кад. Радиоын тайӧ асывнас 7 чассянь 8 да джынйӧдз, а телевидениеын — рытнас 7-сянь 10–11 часъясӧдз. Видзӧдлыны кӧ «Коми гор» телеканалӧ, татшӧм каднас рытъя коми выльторъясыс абуӧсь, но мыйлакӧ рочнас эм 8 час да джынйын да 12 час гӧгӧр войнас нин. «Юрган» телеканалын рытыс юксьӧ кык пельӧ: коми уджтасъясыс овлӧны мыйлакӧ сӧмын 18 чассянь 19 часӧдз, а сідз шусяна прайм-таймас оз юргыны. Гӧгӧрвоана ӧд, унджык йӧзыс серпаскуд водзас пуксьылӧны 19 час бӧрын, удж бӧрын да пажнайтӧм мысти. А мыйла буретш тадзи лои, мыйла тайӧ часас оз позь кывны комисӧ? Асывнас радиоын татшӧм сяма жӧ серпасыс — комиӧн выльторъяссӧ сетӧны водза-водз, 6 час 10 минутын, а 7 чассянь 8 часӧдзыс он и кывлы. Сійӧ жӧ часнас рочӧн выльторъяссӧ сетӧны мыйлакӧ кыкысь — 7 час 10 минутын да 7 час 50 минутын. Поводдя йылысь юӧртӧны став каналас бара сӧмын рочӧн. Ставсӧ артыштӧмӧн воа кывкӧртӧдӧ — вужвойтырлысь чужан кывъя этшаник уджтасъяссӧ зырӧмаӧсь медся лӧсявтӧм кадӧ. И тайӧ — миян интернациональнӧйӧн лыддян республикаын.
Видзӧдлыны кӧ уджтасъяссӧ, серпасыс нӧшта на шуштӧмджык артмӧ. «Юрганӧн» веськӧдлысьяслӧн бӧръя вежсьӧмъясыс эз жӧ кыпӧдны коми кывъя передачалысь тӧдчанлунсӧ. Кыдзи асьныс телевидениесаяс индӧны, коми кывъя уджалысьяс дасьтӧны эфирӧ сетан став уджтассьыс 20 гӧгӧр прӧчентсӧ. Татшӧмыс «Миян йӧз», «Вочакыв», неважӧн на вӧлі «Сёрни-басни». Дерт, эм и «Талун», но сэні матӧ став сюжетас йӧзыс комиӧн оз сёрнитны, весигтӧ коми сиктъясын босьтӧны интервьюсӧ рочӧн, тшӧкыда роча-коми акцентӧн.
Сёрнитны кӧ Коми кывлӧн во йылысь, то таво буретш коми кывлы да культуралы сиӧм торъя уджтасыс эз и чуж, мед кӧть и недыр кад кежлӧ, во помӧдзыс. Быд вежон помын «Коми горын» да «Юрганын» дасьтӧны кывкӧрталан юӧр сетан-донъялан уджтасъяс (
