СИӦМА АСЛАС ВЕЛӦДЫСЬЛЫ

Неважӧн Ханты-Мансийск карын петӧма филологияса доктор, профессор Евгений Игушевлӧн выль велӧдчан отсӧг — «Сравнительная грамматика финно-угорских языков».

Татшӧм небӧгыс Россияын петавлӧ зэв шоча, студентъяс киын кызвынсӧ овлӧны кутшӧмкӧ ӧти кыв серти гижӧмторъяс. Сӧмын медписькӧс, уна тӧдысь туялысьяс вермӧны гижны небӧгъяссӧ став финн-йӧгра да самодий кывъя материал шымыртӧмӧн.

Ассьыс бӧръя небӧгсӧ Евгений Игушев сиӧма медводдза велӧдысь аньыслы — Анисия Мироновна Кожевиналы. Эм водзкыв, сизим юрпас, бӧркыв, гижӧд лыддьӧг, ставнас сэні 79 лист бок. Дженьыда кӧ, тайӧ книгаыс сы йылысь, кыдзи торъялӧмаӧсь финн-йӧгра кывъяс, кутшӧм ӧткодьлунъяс найӧ кутӧны ӧнӧдз, кыдзи кузь кадколастӧ сёрниыс вежласьӧма. Евгений Александрович, кыдзи уна кыв тӧдысь, вайӧдӧ вежлӧг быд тема серти. Позьӧ казявны, мый гижысьыслӧн тайӧ бӧръя уджас медыджыд ин босьтӧны об-йӧгра, манси да хант, а сідзжӧ самодий, яран да нганасан кывъяс.

Книгасӧ рочӧн гижӧма да, та понда сійӧн позяс вӧдитчыны Россияса матӧ став университетас, кӧні велӧдӧны финн-йӧгра кывъяс да культура.