«СЕЛЭМ СИЛЭМ» ПЕЛЬТӦ ВУНДӦ
Грымакылӧмӧн муніс Нёбдінса Витторлӧн чужӧмсяньыс 120 во пасйӧмыс. Вӧльгым (ноябрь) тӧлысь 21 лунӧ Нёбдін сиктӧ ӧти лун кежлӧ вужъясьліс Коми Республикалӧн культура шӧриныс: унаӧн волісны сэтчӧ енбиа коми гижысьӧс казьтыштны-нимӧдны, гажаа концертасьны, копыртчывны Эжва вадорын куйлысь казьтылан излы.
Нёбдінса, кӧрткерӧсса дай республикаыс дзоньнас бура дасьтысьӧмаӧсь тайӧ кадпас нуӧдігкежлас: петӧма вель уна небӧг-брошюра, календарь, Витторлысь гижӧдним индалысь да с. в. Сӧмын мыйлакӧ матӧ ставыс рочӧн, абу весиг кык кывйӧн. Шуам, мичаа вӧчӧм вкладышас классикным йылысь юӧрсӧ сетӧма рочӧн. Аттьӧ кӧть, кывбуръяссьыс юкӧнъяссӧ убӧлитӧмаӧсь комиӧн вайӧдны.
Нёбдін сиктын унатор йитчӧма Нёбдінса Витторкӧд, тайӧ тӧдчис быдлаын. И ставыс эськӧ лада-бура колис, эз кӧ ӧткымынтор серпассӧ тшыкӧд. Ӧти-кӧ, ыджыд коми гижысьлысь дай некодлысь небӧгъяссӧ эз вузавлыны ни эз петкӧдлыны. Тайӧторйыс миян республикаын культура олӧмсьыс вошӧма. Нёбдінса Витторӧс нимӧдім сылӧн небӧгъястӧг. Эськӧ и концерт вылас войтырсикас политикаса министр В. И. Коробов клуб посйӧдсянь петкӧдліс В. Савинлысь выльӧн лэдзӧм ӧти мича небӧг да гораа та йылысь висьталіс, но унаӧн тӧдісны нин, мый тайӧ выль йӧзӧдӧмторйыс Нёбдінса дай дзоньнас республикаса олысьяслӧн гортса библиотекаясӧ оз веськав. Оз пӧ позь вузасьны коми небӧгъяснас дай ставыс! Мукӧд республикаас вузасьӧны, а миян оз артмы.
Концертыс муніс куим час сайӧ, сьылысь-ворсысьыс воӧмаӧсь уналаысь — Выльгортысь, Кӧрткерӧсысь, юркарысь, Визинысь, Помӧсдінысь. Унджыкыс сьылісны кывъяссӧ мичаа шуалӧмӧн, дзик коми ног, Нёбдінса Витторӧн гижанног-шуанногсӧ пыдди пуктӧмӧн. Шуам, Визин сиктысь куим айлов кочкавмӧн серам петкӧдлісны «Тутуруту Семӧ» сьыланкывйӧн. Сӧмын вӧліны тшӧтш сэтшӧм котыръяс, кодъяс шуалісны кывъяссӧ кыдзисюрӧ, Ӧ пыдди Э, Ы пыдди И сьылісны, «селэм силэм» пӧ тайӧ. Та вӧсна дзик коми йӧзлы эз во тайӧ сьӧлӧм вылас, ропкӧдчӧны вӧлі. Дерт, рочӧн сёрнитысьлы, гашкӧ, тайӧс шуны сьӧкыд. Но ӧд петан кӧ посйӧд вылас, колӧ кужны нин вомтӧ восьтавны. Кодсюрӧ весиг кывъяссӧ лёка тӧдісны. Шуам, Выльгортысь кыкӧн сьылісны «Чужи-быдми сьӧд вӧр шӧрын» сьылан да ӧтиторсӧ кык пӧв ливкйӧдлісны, кывъяссӧ вунӧдӧмаӧсь да. А опера театрысь артист «Югыд кодзув» сьылігӧн сьылан шӧрас вуджліс китай нисьӧ япон кывйӧ, мыйкӧ кутіс шуавны о-у-ии-ээ-аа сяма, бара кывъяссӧ вунӧдӧма да.
Со и нимкодясь, коми морт, татшӧм «селэм силэм»-ӧн. Дерт, кодкӧ чайтас, тайӧ пӧ поснитор. А кодлы кыдзи! Чайта, Нёбдінса Витторӧс нимӧдіг-казьтылігӧн коми кывйыслы коліс юргыны лӧсьыда, мичаа, ыджыд гижысьным кыдзи коркӧ ас олігас на кӧсйывлӧма.
