ВЕТЫМЫН НА ЭСЬКӦ СӦМЫН ТЫРИС...
Кадыс кыккокйыв лэбӧ. Тӧдлытӧг со кольӧма нин нёль во Степан Александрович Юговлӧн, коми литература туялысьлӧн, критиклӧн, филологияса кандидатлӧн нем виччысьтӧг кувсьӧмсянь. Таво эськӧ пасйим сылысь 50 арӧс тырӧмсӧ, ловъя кӧ вӧлі.
Степан Югов чужлӧма 1958 вося йирым-октябрь тӧлысся 19 лунӧ Сыктыв районысь Куратов сиктсӧветувса Выльгрездын. 1966 воӧ пырӧма велӧдчыны Заречьеса кӧкъямыс класса школаӧ, 1974-ӧдын сійӧс помалӧм бӧрын мунӧма Куратов сиктса шӧр школаӧ ӧкмысӧд классӧ. А 1976 воӧ помалӧма сэні жӧ дасӧд класс. Сійӧ вонас С. А. Юговлӧн заводитчӧма уджалӧмыс, медводз вӧлӧма «Куратовскӧй» совхозын быдсяма удж вӧчысьӧн, сэсся трактористалӧма, зільӧма и комплексса бригадаын бригадирӧн. Му дорын уджалігӧн том морт век мӧвпавлӧма велӧдчыны водзӧ, паськӧдны тӧдӧмлунъяссӧ медводз коми филологияын, фольклор да литература туялӧмын. Бригадирӧс кыскӧма Сыктывкарӧ тӧдӧмлунъясла.
1982 вося ӧшым тӧлысьын С. А. Югов лэччӧма совхозлӧн ыстӧм серти карӧ да пырӧма Сыктывкарса университетбердса студентавны дасьтан курс вылӧ, сідз шусяна рабфакӧ. Во мысти нин сійӧ филология факультетса студент, коми кывйӧ да литератураӧ пырӧдчысь. Велӧдчигас нин Степан Александрович пондӧма туявны коми литературалысь гусяторъяссӧ, гижӧма диплом уджсӧ эпическӧй гижӧдъяс школаын велӧдӧм йылысь. Кыдзи казьтывлӧ СГУ-са вӧвлӧм профессор, Юговлӧн велӧдысьыс Евгений Александрович Игушев, Степан Александрович студенталігас нин вӧлӧма зэв киподтуя мортӧн, ставныслы окотапырысь отсасьлӧма, ветлӧма сёрнисикас материал чукӧртан экспедицияясӧ, окотапырысь пырӧдчӧма коми филологияӧ.
1988 воын Степан Югов помалӧма университет да пырӧма Кыв, литература да история институтӧ стажёр-туялысьӧн, медым тыр-бура дасьтысьны аспирантураын велӧдчигкежлӧ. Та бӧрын том зон босьтӧма тӧдӧмлун Коми наука шӧринса аспирантураын, «Сӧвет ӧтувлунса войтыръяслӧн литература» специальносьт серти, уджысь орӧдчывтӧг гижӧма кандидат ним вылӧ диссертация, коді шусис
Том морт уджалӧма Коми наука шӧринысь Кыв, литература да история институтын литература юкӧдын, пыдісянь тӧдмалӧма челядьлы коми литературасӧ дзоньнас. Колӧ тӧдчӧдны, мый Степан Александрович Юговӧдз челядьлы коми литература торйӧнсӧ эз на вӧв тӧдмалӧма-туялӧма, та йылысь мыйтакӧ гижліс сӧмын тӧдчана коми фольклорист Ю. Г. Рочев. Югов да Рочев тайӧ ӧтувъя подув вылас лоины бур ёртъясӧн, век вӧлі вежласьӧны мӧвпъяснас, кӧсйӧмъяснас. Талун позьӧ нин шуны, мый дорйысьнысӧ С. А. Юговлы вӧлі сьӧкыд, сылысь диссертациясӧ некымынысь эз ошкывны ас институтса туялан сӧвет вылын. И медтӧдчана критикъясыс пӧ вӧлӧмаӧсь найӧ, кодъяс коминас оз лыддьысьны ни оз сёрнитны! Та вылӧ видзӧдтӧг Чебоксарыын дорйысигас унаӧн пасйӧмаӧсь Юговлӧн уджыслысь бурлунсӧ, мӧвпаланногсӧ. Таын, дерт, ыджыд пай вӧлі и филологияса доктор В. Н. Дёминлӧн. Помтӧг жаль, мый ни велӧдысьыс, ни велӧдчысьыс миян пӧвстын абуӧсь нин.
Степан Александрович вӧлӧма ӧтка пиӧн, быдмылӧма айтӧгыс. Муса мамсӧ ёна вӧлі радейтӧ, век тэрмасьліс гортас отсыштны сылы. Чужтысь-быдтысьыслӧн кувсьӧмыс коктӧммӧдӧма С. А. Юговӧс, тайӧ шогыс мырддьӧма олӧмсьыс колана подувсӧ, дзик ӧткалуныс айловлы содтӧма шуштӧмлунсӧ, лача абутӧмсӧ.
Наукаӧ Степан Александрович нырччис выльмӧдан, перестройка кадӧ. Та вӧсна сылӧн интересыс вӧлі паськыд. 80-ӧд воясӧ сійӧ вӧлі «Ордым» литературнӧй котырын, зіля пырӧдчис и Каллистрат Жаковӧс корсьысян уджӧ, комиӧдліс да йӧзӧдліс сылысь некымын мойд. Аслыссикас статья гижліс тшӧтш Питирим Сорокинлӧн некымын удж йылысь, корсявліс и Иван Куратовлӧн олан да енбиа туй йывсьыс тӧдмавтӧмторъяс. Гижліс тшӧтш челядь литератураысь критика гижӧдъяс, йӧзӧдліс найӧс «Войвыв кодзулын».
2000 вося сора-июль тӧлысь заводитчигӧн, чужан сиктас шойччигӧн, зэв пӧсь сынӧда лунӧ Степан Александрович нем виччысьтӧг кувсьӧма. Дзебӧмаӧсь сійӧс чужан Куратов (Кебра) сиктса шойнаӧ муса мамыскӧд орччӧн. Тайӧ авъя коми мортыс, енбиа том учёнӧйыс нэм кежлӧ коляс миян паметьын.
