КЫТЧӦ БАРА ШЫБӦЛИТАС-А?

Ӧнія олӧмын унатор шензьӧдӧ. Серпаскудйысь позьӧ видзӧдны быдсяматорсӧ, радио мыйсӧ сӧмын оз висьтав и. Весигтӧ унаторйӧ сьӧкыд вӧлі эськӧ эскыны 10–20 во сайын на. Висьтала со мый йылысь.

Таво урасьӧм тӧлысь 27 лунӧ ветлі республикаса филармонияӧ «Асъя кыа» котырса хорлӧн концерт вылӧ, важӧн нин коми сьыланъяссӧ налысь эг кывзыв да. Сьылісны важ репертуарсьыс нёль коми сьыланкыв, и ставыс! Водзӧ пондісны ливкйӧдлыны вичко сьыланъяс рочӧн, сэсся вуджисны роч попсаӧ, а бӧрас нин кутісны сьывны мудорсайса кывъясӧн, «Бесамемучо» да «Естэдэй» роч акцентӧн шняпуритісны. Кытчӧ бара шыбӧлитӧма коми сьылан паськӧдан ансамбльнымӧс? Этша ӧмӧй кылам рочӧн да англия-италия кывъясӧн быдласянь нин? А мыйла эськӧ ӧнія коми зэв юргана сьыланкывъяссӧ оз сьывны? Со тай Кулӧмдінын «Василей» гажыс дас витӧдысь нин пансьылӧма, мыйта мелі шылада сьылантор сэні чужӧма? Мый вӧчсьӧ «Асъя кыаас»?

Серпаскудйысь ӧні коми сёрниыс кылӧ зэв этша, быд лунъя уджтасыс сӧмын кык — «Талун» да «Сёрни-басни». Баснисӧ кылан 4–5 минутысь он дырджык, коми йӧз быдсямасӧ висьтавлӧны. Тайӧ бур нин. А вот «Талун» уджтасас зэв шоча сёрнитӧны ас кывйӧн, век рочӧн шарӧдӧны. Асьныс жӧ нуӧдысьясыс вель тшӧкыда медся прӧст да бергалана коми кывъяссӧ, тыдалӧ, вунӧдӧны. Али оз нин тӧдны, кыдзи коминас шусьӧ крыша, разберитны, избирательнӧй участок. Рака тӧлысь 21 лунся «Талун» уджтасысь шогӧдіс. Нуӧдысьыс, том морт, университет помалысь, син лапниттӧг шуис: «Козинӧн аньяслы лои сунислӧн нёль моток»; «Данияысь пловечлӧн лои сереброысь медаль». Со и воим — сунис тупыль, варччысь да эзысь медальтӧ лои сьӧкыд шуны. А гашкӧ, уджтассӧ бӧръя здукас комиӧдӧны код тӧдас кутшӧм тӧдӧмлунъяса йӧз? Коми кыв тӧдысь видзӧдысьлы тайӧ шыбӧлясьӧмыс пинь дой кодь: висьӧ-юкалӧ, а бурдӧдчаныс абу.

Вайӧ, журналистъяс, энӧ нин янӧдӧй ассьыныд велӧдысьяснытӧ, уна йӧз водзад колӧ комиӧн сӧстӧма, дерт, сёрнитны. Татшӧм удж кӧ нин бӧрйинныд.

Дай рочнас кыдзсюрӧ сёрнитӧны. Шуам, зэв тшӧкыда миян Коми Республикаӧс ӧні шуӧны регионӧн, республикаса Юралысь пыдди — губернатор региона. А ӧд тайӧ каналан каналын уджалысьяс паськӧдӧны абутӧмсӧ. Россияса Оланподув серти, федерациясӧ артмӧдӧны республикаяс, дормуяс (крайяс), обласьтъяс, автономияа кытшъяс да обласьтъяс, федерацияа тӧдчанлуна кык юркар. Некутшӧм регион кыв сэні абу. А миян республикаын медыджыд мортыс юралысь, рочӧн кӧ, глава. А гашкӧ, тадзи тӧдӧмӧн вӧчӧны, дасьтӧны ми вокӧс ӧткодь балаа лӧсьӧдана кутшӧмкӧ регионын нин олӧм кежлӧ? Шыбӧлясьӧны, вермас лоны, тӧдӧмӧн? А тэ кыдзи чайтан, коми лыддьысьысь?