ВЕЛӦДӦНЫ И ИЖКАРЫН ДА ПАРИЖЫН

Кольӧм во коми кыв велӧдӧмын вӧлі вӧчӧма тӧдчана воськов: петісны миян кывйӧ пыртӧдан вель уна небӧг и Сыктывкарын, и мукӧдлаын.

Неважӧн на Ижкарысь, Удмуртия Республикаса юркарысь, ыстісны выльӧн лэдзӧм «Чолӧм!» небӧг. Гижӧма сійӧс Удмуртия госуниверситетын велӧдысь, филологияса кандидат Мира Анатольевна Самарова, коді уна во сетӧ сэтчӧс удмурт-студентъяслы коми кыв йылысь бур тӧдӧмлунъяс. И со петӧма 180 лист бока торъя велӧдчан небӧг. Сэтчӧ чукӧртӧма вель уна гижӧд, индӧд, сёрни, гортса удж. М. А. Самарова бура вӧдитчӧма зэв уна литератураӧн, сійӧ тӧдӧ миян республикаын йӧзӧдӧм став бӧръя велӧдан небӧгсӧ. Кольӧм во ачыс воліс стажируйтчыны Сыктывкарса канму университетӧ. Зэв бур, мый орчча Удмуртия Республикаса шӧр университетас уна во нин велӧдӧны коми кыв. Студентъяс окотапырысь лыддьысьӧны комиӧн, вуджӧдчӧны, вӧчӧны мукӧд удж. Тайӧ отсалӧ сэтчӧс том йӧзлы туявны ас удмурт кывнысӧ миян кывкӧд ӧткодялӧмӧн, ӧтлааститӧмӧн.

Мӧд бур юӧр воис Францияса Парижысь. Сэні петӧма коми кывйӧ пыртӧдан дзик на медводдза «Сёрнитыштам комиӧн» небӧг. Гижӧма сійӧс Коми муӧ некор на волытӧм морт Ив Авриль. Книгаыс петӧма «Ларматан» небӧг лэдзанінын, йӧрышыс сылӧн 280 лист бок. Позьӧ шуны, тайӧ небӧгыс абу сӧмын коми кывйӧн, а дзоньнас миян республикаӧн тӧдмӧдысь аслыспӧлӧс удж, ӧд гижысьыс сэтчӧ пыртӧма быдсяма юӧрсӧ: и Коми мулӧн тэчас, и история, и нималана йӧз, и йӧзкостса поэзия, и литература йылысь. Тӧдӧмысь, Францияын тайӧ медводдза йӧзӧдӧм небӧг, коді сетас позянлун велӧдны коми кыв. Шемӧс босьтӧ, мый суйӧрсайса морт вермӧма дасьтыны татшӧм уджсӧ. Тайӧ, дерт, висьталӧ авторыслӧн ыджыд вежӧр да сям йылысь.