ТАТШӦМЫС МЕДВОДДЗА НА

Неважӧн Ханты-Мансийск карын петӧма выль велӧдчан небӧг — «Практикум по учебному курсу «Введение в финно-угроведение». Гижӧма сійӧс Коми муын паськыда тӧдса морт, филологияса доктор, профессор, ӧні Сибырын, Йӧгра муын, уджалысь Евгений Александрович Игушев.

Кыдз тӧдса, Евгений Александрович уна во велӧдіс миян Сыктывкарса университетын да лыддьыліс студентъяслы «Финно-угроведениеӧ пыртӧд» курс. Сійӧ дасьтыліс и тайӧ курссӧ велӧдӧм могысь торъя пособиеяс. И со мунӧма профессор Ханты-Мансийскӧ уджавны да казялӧма, мый сэтчӧс студентъяс лы та кузя лыддьынысӧ вӧлӧм нинӧм. Да и рочӧн финно-угроведение йылысь некутшӧм велӧдчан пособие абу петавлӧма.

И Евгений Александрович зіля босьтчӧма дасьтыны выль небӧгъяс, ӧні нин рочӧн, ӧд сэтчӧс студентъяс ставсӧ сэні велӧдӧны рочӧн, тшӧтш и манси да ханты кывъяс. Тайӧ выль небӧгас Евгений Александрович чукӧртӧма уджъяс, кодъяс отсӧгӧн студентъяс петкӧдлӧны да ёнмӧдӧны ассьыныс тӧдӧмлунсӧ. Ставсӧ вайӧдӧма 57 удж: финн-йӧгра кывъясса шыяс, кыв артмӧм, морфология, синтаксис да кыввор шымыртан темаяс кузя. Уджъяссӧ дасьтӧм могысь чукӧртӧма зэв унатор дас квайтнан финн-йӧгра кывсьыс. Сетӧма помас тшӧтш вӧзъяна литература лыддьӧг. Йӧгра канму университетын студентъяслы ӧні позяс нин тыр-бура велӧдны ордвуж кывъяслысь ӧтувъя теориясӧ. Позьӧ шуны, дзоньнас Россия пасьтала татшӧм небӧгыс медводдза на, та вӧсна сылӧн тӧдчанлуныс ыджыд. Жаль сӧмын, мый небӧгсӧ лэдзӧмаӧсь ичӧтсьыс-ичӧт лыдӧн, тиражыс сӧмын 55.

Профессоркӧд неважӧн аддзысьлігӧн тӧдмалі, мый сійӧ витӧд во нин велӧдӧ-олӧ ылі муын. Позьӧ шуны, сэтчӧ вужъясьӧма, ас мортӧн лоӧма.

* * *

Ӧти сайын Евгений Александрович «Коми му» газет пыр чолӧмаліс ассьыс став вӧвлӧм студентсӧ да сыкӧд ӧтлаын уджавлысь велӧдысьсӧ выль 2008 воӧн да сиис став бурсӧ, зумыд дзоньвидзалун да ыджыд шуд.