ЭН ЭСКӦЙ, ЙӦЙТӦДЛӦНЫ МИ ВОКТӦ

Неважӧн командировкаӧ мунігӧн ковмис кузь лунтыр жӧдзны Мӧскуаын, рытъя поездыс вӧлі сёр рытын сӧмын да. Асывнас Россияса юркарӧ вотӧдз гажтӧм мӧвп юрам бергаліс — ыджыд карас бур ёрт менам абу да быть ковмас шлёнъявны мудзтӧдз ызгысь карын.

Казаньса вокзалӧ мӧдӧдчи да сумкаӧс сьӧкыда кыска, багаж видзанінлань туй корся. Му пытшті вуджанінсянь петі, муна-довга гажтӧмпырысь. И друг кыськӧ ме водзӧ мичаник ныв ли ань сувтіс, бура пасьтасьӧма-вӧччӧма, паськыда нюмъёвтіс да тӧкӧтьӧ нин эз дзигӧдышт. Видзӧда да ог тӧдмав, код тайӧ мича аньыс, быттьӧкӧ и тӧдтӧм, быттьӧкӧ и тӧдса. Сӧмын кӧні аддзысьлім-а? Юрӧ нинӧм оз пыр. А аньыс гулю моз пондіс кургыны-висьтасьны. Вӧлӧмкӧ, ачыс сійӧ зэв нималана «Телешоп» вузасян фирмаысь менеджер. Миян карысь мэр Юрий Лужков пӧ сетӧ Мӧскуаӧ быд 10.000-ӧд воысьлы дон босьттӧг козин да, вӧлӧмкӧ, буретш пудйыс ме вылӧ усьӧма. Тайӧс вынсьӧдӧм могысь аньыс мыччыліс ныр улӧ фирмаыслысь морӧсӧ ӧшӧдан бейджик да кутшӧмкӧ посни гижӧда да ыджыд печатя кабала. Кабала вылас юрйылас серпасалӧмаӧсь Россиялысь канмупас — кык юра кутшӧс. Чолӧмалам пӧ тэнӧ сьӧлӧмсянь, ӧні жӧ пӧ и козинсӧ сетам.

Ок, кутшӧма сьӧлӧмӧй небзис сэки, синва петмӧн лои. Абу и дивӧ эськӧ да: сӧвет кадӧ ДОСААФ лотереяын куим шайтысь ӧтдор немтор эз усьлы, ӧнія роч лотоясад эг нин и ворслы. И со мойвиис!

Шӧйӧвошӧмла да нимкодьла кывйӧс сетны эг вермы да барвидза-сулала вашъялігтыр, весиг сумкаӧй пельпом вылысь мынӧма, да ог и казяв. Том аньыд корис ас дорас орччӧн сулалысь шкап кодь ён зонмӧс да сы киысь пакетсӧ босьтӧмӧн пондіс лыддьӧдлыны-петкӧдлыны лышкыд Лужковсянь козинъяссӧ: выль мича утюг (кӧть гортын эм кык, коймӧдыдлы местаыс сюрас), мичаа серӧдӧм-мавтӧм электрочайник, пуртъяс да вилки-пань чукӧр, вом дор да мукӧдтор чышкалан мича кабалаяс, кушман-морков вуштантор, киняулысь да кокъясысь гӧн шыран (чышъяналы тайӧ кутшӧм коланатор), электробиӧн уджалан юрси шыран (тайӧ аслым нин лоӧ, мыйта сьӧм чӧжа, шырсянінас кӧ кувтӧдз нин ог пырав), сэсся юрси мавтан краска, посни шампунь, штопоръяс да мукӧд шылльӧ-мылльӧ. Эз и юасьны ёнасӧ менсьым да киӧ сутшкисны дзик сэтшӧм жӧ дзик выль мӧд пакет, вель сьӧкыдӧс.

Сӧмын аньыс содтіс нӧшта меным, шудалы, фирмаыс пӧ ставсӧ сетӧ дон босьттӧг, но складысь вайӧмсьыс да тэчӧм-тубрассьыс босьтӧ «символическӧй» сьӧмтор — 800 шайт да менсьым овӧс та бӧрти пыртасны торъя войтырлыддьӧгӧ, кодъясӧс бара на пудъяласны.

Но тайӧ тшаква, мӧвпышті ме да понді нин сьӧм папушаӧс морӧс зептысь перйыны. Пакетас, мися, 800 шайтсьыд, дерт, нин ёна унджык сьӧм вылӧ быдсяма козиныс. Сэки мича аньыд ме йылысь ӧдйӧ вунӧдіс да нюмъявтӧг нин зэв ӧдйӧ бокӧ вешйис-муніс, а ме дорӧ мышсянь матыстчис нӧшта ӧти «качок». Вай пӧ ӧдйӧджык мынты да тэрмась аслад поезд вылӧ, чӧвтіс пинь пырыс. Сэки юрам падъялана мӧвпъяс воны кутісны. Мыйла, мися, козиныс кӧ Лужковсяньыс зэв донтӧм, мем быть колӧ мынтысьны скотчӧн лясйӧдлӧм пакетысь 800 шайт? Мыйла некутшӧм квитанция оз сетны дай мича аньыс кытчӧкӧ усйысис? Мыйла тайӧ кык «шкапыс» топӧдісны Мӧскуаӧ 10.000-ӧд шуда воысьӧс? Сэк юрам югнитіс, мый ылӧг тайӧ ставыс! Ме ӧдйӧ пукті козинсӧ асфальт вылас да сумкаӧс кватитӧмӧн мӧдӧдчи. Но кысь тай?.. Мышкын сулалысь мӧд «шкапыс» сойбордӧс топӧдіс да пинь пырыс чӧвтіс, босьт пӧ козинтӧ да ӧдйӧ мынтысь. Менам шуд вылӧ орччӧн мунісны кык милиционер, ме на син водзын кык том морт костысь мырдӧн ырыштчӧмӧн петі, да эз тай вӧтчыны-а...

Дона лыддьысьысь, кутасны кӧ Мӧскуаад мича аньяс тэныд донтӧм козинъяс сетавны Юрий Лужков нимсянь, эн эскӧй — йӧйтӧдлӧны ми воктӧ, Россияса юркарӧ шоча волысьястӧ.