БАРА НА АДДЗЫСЬЛІМ
Таво апрельын, комын во мысти, аддзысьлісны Визинса шӧр школаын дасӧд «б» класс помалысьяс. Чукӧрмыліс джынйыс кымын, 17 морт. Пасъя, Визинса шӧр школа век нимавліс аслас педагогъясӧн да велӧдчысьясӧн, и дзик на неважӧн сылы вичмӧма Россия Президентсянь грант — миллион шайт.
1977 воӧ школасӧ помаліс куим класс: кык коми да ӧти роч. Бӧръяас, дерт, дзик рочыс, коми кыв тӧдтӧмыс, вӧлі сӧмын некымын морт. Куимнан классас велӧдчысьясыс ёртасисны ӧта-мӧдыскӧд, но сӧмын 10 «б»-ным, кыдзи ӧні тыдовтчис, вӧлӧма медся ӧтсӧгласа да ладмысь котырӧн.
Чукӧртчылім субӧта рытӧ, корлім, дерт, и классӧн вӧвлӧм веськӧдлысь, коми кыв да литература велӧдысь Нина Васильевна Киневаӧс. Медшоныд кывъяссӧ сиим буретш вӧвлӧм велӧдысьяслы, кодъяс унаӧн нин абуӧсь таладор югыдас. Гарышта, бӧръя ыджыд чукӧртчылӧмыс миян вӧлі дас во сайын. Кольӧм каднас кувсьӧма медводдза велӧдысьным — Анна Михайловна Пыстина, да нӧшта миян классын кык велӧдчысь мунӧмаӧсь кадсьыс водз таладор югыдсьыс. Ставӧн сувтӧмӧн казьтыштім шонъянӧйясӧс да кӧсйысим век найӧс помнитны. Сёрни, казьтылӧм, юасьӧм, йӧктӧм-ворсӧм кыссис вой шӧр бӧрӧдз. Ми, коркӧя ныв-зон, кӧсйысим бара на аддзысьлыны вит во мысти.
Кутшӧм ордымӧд ӧні — комын во мысти — восьлалӧны вӧвлӧм нывъяс да зонъяс? Ставӧн уджалӧны, быдтӧны челядьӧс, уналӧн верстьӧ ныв-пиныс асьныс нин «позъяс» лӧсьӧдӧмаӧсь да гӧгапи-гӧганывъясӧс козьналӧмаӧсь ай-мамыслы. Чуклӧм сиктын олысь Николай Сажин — бизнесмен. Кызвыныс олӧны-уджалӧны Визин да Чуклӧм сиктъясын, некымынӧн — Сыктывкарын, ӧти ань Мӧскуаын. Нывъяс пиысь ӧти — Сыктыв райгазетса редактор, эмӧсь сідзжӧ школаын велӧдысьяс, социальнӧй отсӧг сетысьяс, райадминистрацияын уджалысь-служитысьяс да с.в. Зонъяс пиысь ӧти коми кыв туялӧ, мукӧдыс зільӧны торъя фирмаясын да каналан учрежденньӧясын. Медся уна челядьыс (нёльӧн) Михаил Сельковлӧн, Чуклӧм сиктын жӧ олысьлӧн.
Ӧнія сьӧкыд кадӧ унаӧн уджалӧны кыклаын, ӧд быдтысьнытӧ абу кокни. Но та вылӧ видзӧдтӧг рытйысигӧн некод нинӧм вылӧ эз норась. Элясьнытӧ, ми вок, ог на-й зэв радейтӧй.
Чукӧртчылӧмыс вайис миянлы сӧмын кыпыдлун, чужтіс сьӧлӧмъясын аскиа лунӧ лача.
