ВЫЛЫС ЭЖВАЛӦН ГОР

Неважӧн Суомиса Хельсинки юркарын петіс коми сёрнисикаслӧн гижӧдъяса выль небӧг. Нимыс сылӧн «Коми текстъяс, витӧд том».

Гижӧма небӧгсӧ немеч кыв вылын. Став гижӧдсӧ комиысь немечӧ вуджӧдӧма да пасйӧдъяссӧ дасьтӧма Паула Кокконен, Сыктывкарын да ставнас Коми муын уналы бура тӧдса финн учёнӧй. Небӧгыс вель кыз. Сэтчӧ да таӧдз петӧм мукӧд 4 томас чукӧртӧма нималана финн учёнӧй Томас Уотилаӧн пленӧ веськавлӧм коми салдатъяслысь гижалӧм висьтъяссӧ.

Бӧръя витӧд томыслӧн аслыспӧлӧслуныс сыын, мый сэтчӧ пыртӧмаӧсь дзик ӧти салдатлысь висьтъяс. Тайӧ вӧлӧма зэв унатор тӧдысь коми морт. Финнъяслы Великӧй Отечественнӧй война дырйи веськавлӧма пленӧ уна салдат. На лыдын вӧлӧмаӧсь и комияс. Томас Уотилалы 1941–1942 воясӧ мойвиӧма паныдасьны Михаил Егорович Жикинкӧд да гижны сылысь уна мойд, вӧвлӧмтор, нӧдкыв, сьыланкыв, шусьӧг да кывйӧз.

М. Е. Жикин чужлӧма 1909 вося октябрь мӧд лунӧ Керчомъя сиктсӧвет улӧ пырысь Кипин грездын, велӧдчӧма начальнӧй школаын сӧмын кык во. Гӧтрасьӧм бӧрас вуджӧма овны Сыктывкарӧ. Ачыс Томас Уотила тӧдчӧдӧма, мый татшӧм уна тӧдысь том мужичӧйсӧ абу на паныдавлӧма. Михаил Егорович висьтасьӧма учёнӧйлы уна лун чӧж.

Татшӧм ногӧн миян водзӧ сувтӧ коми морт Михаил Егорович Жикинлӧн сёрниыс, кодӧс гижӧма латин шыпасъяса финн-йӧгра транскрипцияӧн. Выль небӧгыс тӧдмӧдӧ финнъясӧс Комиысь Вылыс Эжваса аслыссикас фольклорӧн.