ТИКӦӦС ТӦДӦНЫ И ЭСТОНИЯЫН

Кольӧм 2006-ӧд воын коми да эст литература костын артмис выль зумыд йитӧд.

Медводдзаысь на лои йӧзӧдӧма некымын вуджӧдӧм небӧг Таллинын да Сыктывкарын. Ӧти-кӧ, Комиын вӧлі комиӧдӧма да йӧзӧдӧма Эно Раудлысь «Сипси — ловъя акань» висьткуд, челядьлы гижӧмтор, а сідзжӧ Арво Валтонлысь бӧрйӧм прозаа торъя небӧг. Таллинын эст кывйӧ вуджӧдӧма вӧлі да лэдзӧма Владимир Тиминлысь «Эжва Перымса зонка» повесьтсӧ. Комиӧдӧмаӧсь эст гижысьяссӧ веськыда налӧн кывйысь Евгений Цыпанов да Николай Кузнецов, эст кывйӧ жӧ коми небӧгсӧ вуджӧдӧма Арво Валтон роч кывъя текстысь. Татшӧм ногӧн, медводдзаысь на петісны Комиын да Эстонияын прозаысь йӧзӧдӧм торъя небӧгъяс, таӧдз петавлісны сӧмын антологияяс.

Владимир Тиминлӧн эст кывйӧ вуджӧдӧм повесьтыслӧн нимыс неуна мӧдджык — «Важ Перымса Тикӧ зонкакӧд вӧвлӧмторъяс». Кыдзи пасйӧма небӧг заводитчигӧн вуджӧдысьыс, Елена Габоваӧн рочӧдӧм «Мальчик из Перми Вычегодской» небӧгсӧ ковмис дженьдӧдыштны, а сідзжӧ морт нимъяс да иннимъяссӧ эст кывъя текстас вайӧдӧмаӧсь коми ногӧн. И збыль, став геройыслӧн нимъясыс коми ног юргӧны — Юран, Тикӧ, Кыйва, Чангыр (пон ним), Емдін да уна мукӧд. Небӧгыс вель ыджыд йӧрыша, 335 лист бока, эм вель уна серпас.

Водзкывсӧ небӧг дорас вуджӧдысьыс гижӧма сы могысь, медым тӧдмӧдны эст челядьӧс Коми муӧн, татчӧс вужвойтырӧн да важся историяӧн, сетны та йылысь медколана тӧдӧмлунъяс. Заводитчӧ водзкывйыс тадзи: «Видза олан. Чолӧмала тэнӧ, лыддьысьысь! Тэ водзын Тикӧ нима коми зонка йылысь висьт. Сыкӧд лоӧма уна дивӧ сяма тор, сійӧ веськавлӧма уналаӧ да аддзылӧма быдсяма интереснӧй лоӧмтор». Эст челядьлы водзӧ висьталӧма Эжва Перым да Ыджыд Перым йылысь, йӧгра, татара да роч ӧксыувъяс (княжествояс) йылысь.

Дерт, тайӧ водзкывйыс зэв колана эст челядьлы, ӧд найӧ оз зэв уна тӧдны Коми му да йӧз йылысь. Лача кутам, тайӧ небӧгъясыс вуджӧдӧм коми да финн-йӧгра литератураясын абу медводдзаяс, лоасны и выльяс.