ГАШКӦ, ЙӦГРАЛЫСЬ ВЕЛӦДЧЫНЫ?
Кольӧм 2006 воыс Йӧгра мулы вӧлі зэв тӧдчана — Ханты-Манси автономия кытш лӧсьӧдӧмсянь тырис 75 во. Такӧд йитӧдын вӧлі котыртлӧма уна чукӧртчылӧм да конференция. Ӧткымынтор йылысь позьӧ дженьыдика пасйыштны и «Коми му» газет лыддьысь войтырлы.
Во помнас Йӧгра канму университет пасйис восьтӧмсянь 5 во тырӧм. Позьӧ шуны, ӧнія Россияын тайӧ медтом университет. Озыр Йӧгра кытш ас сьӧм вылас кыпӧдӧма выль, мича стрӧйбаяс, ӧтуволанінъяс да корӧм велӧдысьяслы патераяс. Ӧні сэні велӧдчӧ куим сюрсысь унджык студент, на пӧвстын и вужвойтыр, ханты да манси. Эм тшӧтш некымын коми студент. Нёльӧд во нин вузын, финн-йӧгра да ӧтувъя кыв туялан кафедраын, уджалӧ Сыктывкарса университетысь вӧвлӧм велӧдысь, филологияса доктор Евгений Александрович Игушев. Тані профессор лыддьӧ «Финно-угроведениеӧ пыртӧд» курс.
Кольӧм во Евгений Александрович лэдзис весигтӧ кык велӧдчан небӧг. Бӧръяыслӧн нимыс «Введение в финно-угроведение» (снимок вылын), сы серти студентъяслы ёна кивывджык лоас велӧдны курссӧ да сдайтны зачёт-экзамен. Ӧти сайын Е. А. Игушев корис чолӧмавны «Коми му» газет пыр став ассьыс велӧдчысьсӧ выль 2007 воӧн да сины налы кузь нэм, бур шуд да дзоньвидзалун.
Ноябрь помын панӧмсяньыс 15 во пасйис и Об-йӧгра войтыръясӧс туялан институт, вӧлі котыртӧма став Россияса конференция, кытчӧ воліс 50-ысь унджык морт. Куим лун чӧж историкъяс, кыв туялысьяс, фольклористъяс да мукӧд лыддисны докладъяс да сёрнитісны, кыдзи эськӧ бурджыка тӧдмавны вужвойтырлысь нэмӧвӧйся культурасӧ да оласногсӧ.
Во помын жӧ татчӧс юралысьыс, губернатор Филиппенко, ӧтувъя кыпыд чукӧртчылӧм вылын пасйис, локтан воӧ пӧ кар-посёлокъясын бырӧдам став киссьӧм оланінсӧ. Тайӧ программа сертиыс уджыс мунӧ тыр ӧдӧн: кисьтӧны-бырӧдӧны баракъяс да омӧлик пу керкаяс, олысьяссӧ бюджет весьтӧ овмӧдӧны лючки-бур патераясӧ. Йӧгра муыс дзоньнас быттьӧ ӧти ыджыд стрӧитчанін: кыпӧдӧны выль школаяс, бурдӧдчанінъяс, аэропортъяс, нюжӧдӧны туйяс. Колӧ эськӧ и Коми Республикаса юралысьяслы ветлыны ханты да манси ордӧ, велӧдчыны веськӧдлан уджас, а оз кытчӧкӧ Канадаясӧ да мый да...
И збыльысь, велӧдчынысӧ позьӧ унаторйӧ, ӧд Ханты-Манси автономия кытш — сӧвмысь му. Йӧзыс татчӧ ыльӧбтӧмӧн локтӧны. Олысьыс ӧні 1,5 миллион мортысь унджык нин. Шемӧс босьтӧ, мый Россияын, вӧлӧмкӧ, позьӧ унатор котыртны ёна бурджыка, медводз йӧзӧс социальнӧя могмӧдӧмын. Шуам, татчӧс кудйысь быд бюджетниклы мынтӧны тшӧтш мӧд, округса удждон став войвывса содтӧдӧн. Та вӧсна велӧдысь, бурдӧдысь, журналист олӧ тані кык пӧв озырджыка Ыджыд муын серти. Быд пенсионерлы воӧ округса содтӧд — шӧркодя 1.200 шайт.
Торйӧн шензьӧдӧ Ханты-Мансийсклӧн, вӧвлӧм пу карлӧн, сӧвмӧмыс: ылі пельӧсын кыптӧма ӧнія европаногса мича кар, аслас университета, театра, войтыркостса биатлон шӧрина, выль аэропорта юркар. Мыйла оз позь и Комиысь юралысьяслы вӧчны-уджавны на ног?
