ШЫЛАДЫС «БАЛДАСЯНЬ»?

Войдӧр республикаса серпаскуд уджтасъясын вель тшӧкыда вӧлі петкӧдлӧны «Миян йылысь гижӧны» юрним улын выльторъяс — мый ставсоюзса газет-журналын йӧзӧдӧмаӧсь Коми АССР йылысь. Ӧні татшӧмторйыс абу нин, а корсюрӧ и колӧ эськӧ. Ӧд ас республика вылӧ мӧдджык синмӧн нин видзӧдлан, выль ногӧнджык унатор донъялан.

Сюри син улӧ ставроссияса «Огонёк» журналлӧн 37-ӧд номерысь «Музыка от Балды» гижӧд. Позьӧ шуны, журналыс тасянь и заводитчӧ, юӧрсӧ сетӧма мӧд лист бокас. Гижӧма, Сыктывкарын пӧ опера да балет театрын кӧсйӧмаӧсь пасйыны нималана гижысь Дмитрий Шостаковичлы чужӧмсяньыс сё во тырӧмсӧ «Балда» опера пуктӧмӧн, но ставсӧ пӧ торкӧмаӧсь. Медводз сэтчӧс епархияса попъяс шызьӧмаӧсь да шыӧдчӧмаӧсь культура министерствоӧ, мед пӧ дасьтӧм нин спектакльсӧ оз петкӧдлыны. Культураӧн веськӧдлысьыс сувтӧма попъяс дор, ог пӧ сетӧй сьӧмсӧ дай ставыс. Кӧть тайӧ операсӧ пуктӧм могысь корӧмаӧсь Сыктывкарӧ Вежа Петыркарысь Мариинка театрысь ӧти нималана режиссёрӧс. Делӧыс воӧма сэтчӧдз, мый кӧсйӧны вужвыйӧныс чирклыны операсӧ, сетны сійӧс дженьдӧдӧмӧн. Театрса шӧр режиссёр Ия Бобраковалӧн висьталӧм серти, вылісянь пӧ шуисны, мый «попсӧ петкӧдлыны оз позь». Со и артмӧ театрас «кодзӧм» опера. Тайӧн поттшуйтасны сэсся юркарса видзӧдысьясӧс.

Чайта, татшӧм воськовнас республикаса культура министерство янӧдіс миянлысь Коми мунымӧс, ӧд мукӧдлаас тадзисӧ абу на вӧвлӧма. Попъяс унаторлы паныдӧсь, но мыйла быть налысь кывзысьны? Ӧд опера да балет театр оз пыр епархия улӧ, а А. С. Пушкин да Д. Шостакович гижлісны серамбана мойдсӧ да операсӧ эз вичкоса спектакль пыдди. Да и кыдзи позьӧ торкны шыладсӧ да киритны операсьыс шӧр геройсӧ. Татчӧ пасъям, мый А. С. Пушкин гижлӧма «Балда да поп йылысь» ассьыс мойдсӧ роч йӧзкостса фольклор подув вылын. Сідзкӧ, миян епархияса попъяс да культураса чиновникъяс чирклӧны и нэмӧвӧйся роч фольклорсӧ?

Кодкӧ, гашкӧ, шуас, а мый пӧ, ми вок комилы, татчӧдз? И век жӧ тайӧ миянлы тшӧтш инмӧ. Ӧд и водзӧ кӧ кутасны тадзи вельмыны православие вичкоысь татчӧс юралысьяс, ковмас, гашкӧ, сэсся эновтчыны йӧзӧдны, велӧдны да туявны и став коми мойдсӧ, кӧні шӧр геройыс — поп. Гашкӧ, коми театрысь тшӧтш чӧвтасны Нёбдінса Витторлысь «Райын», «Инасьтӧм лов», «Ва шыр» комедия-тешъяссӧ? Сы понда, мый сэні сералӧны вичкоса горш да дыш попалысьясӧс? Став войтырыс мойдъясас сералӧны попъясӧс, тшӧтш и сар-корольясӧс, баринъясӧс да с.в. А збыльысьсӧ коді нӧ мырдӧн кыскӧ театрас епархияас служитысьяссӧ? Оз кӧ во сьӧлӧм вылад попсӧ видзӧдӧмыс, эн мун дай ставыс. А йӧзыс кӧсйӧны видзӧдны А. С. Пушкинлысь мойдсӧ да кывзыны Д. Шостаковичлысь шензьӧдана шыладсӧ.