ОТСАЛАС И ВЕЛӦДЧЫСЬЛЫ, И ВЕЛӦДЫСЬЛЫ

Сыктывкарса университет йӧзӧдіс «Коми кыв велӧдан методика» небӧг. Сійӧс гижис филология наукаса кандидат, коми да финн-йӧгра кафедраса доцент Галина Пунегова.

Сыктывкарса университет воссис 1972 воын. Сэксянь жӧ сэні дасьтӧны чужан кыв велӧдысьясӧс. Матӧ комын вит во жӧ лыддьӧны коми кыв велӧдан методика курс. Сӧмын ӧнӧдз эз вӧв та кузя некутшӧм небӧг. Буретш медводдза татшӧм отсӧгсӧ и дасьтіс Галина Васильевна.

Небӧгыс 86 лист бока. Сэні некымын юрпас. Медводдзаас висьталӧма кыв велӧдан методика йылысь. Мӧдыс юӧртӧ торъя велӧданногъяс йылысь. Коймӧдсӧ сиӧма коми кыв велӧдігӧн урок котыртанногъяслы. Нёльӧдыс висьталӧ вомгора да гижӧда уджъяс йылысь. Витӧдас пыртӧма юалӧмъяс.

Тайӧ небӧгнас, дерт жӧ, окотапырысь кутасны вӧдитчыны оз сӧмын университетса студентъяс, но и школаясса велӧдысьяс. Ӧд сэні эм зэв уна колана юӧр да материал. Йӧзӧдӧма тшӧтш вель озыр библиография. Жаль сӧмын, мый небӧгыслӧн тиражыс зэв ичӧт. Сійӧ тӧкӧтьӧӧн разалас. Ӧд колана небӧгыд век ӧдйӧ инасьӧ.