ЙӦГРА МУЫН КУИМ ВО

Дзик на неважӧн Рытыввыв Сибырын, Ханты-Мансийск карын, Йӧгра канму университетса небӧг лэдзанінын петіс выль книга, студентъяслы рочӧн гижӧм велӧдчан отсӧг — «Применение данных финно-угроведения в школе». Авторыс — миян нималана земляк, филологияса доктор, профессор Евгений Александрович Игушев, коді куим воысь дырджык нин уджалӧ Из сайын, велӧдӧ сэтчӧс студентъяслы финн кыв да финно-угроведениеӧ пыртӧд.

Сідзи нин артмис, мый Ханты-Манси автономия кытшын университетсӧ вӧлі восьтӧма нёль во сайын, и велӧдӧны сэтчӧс манси да хант студентъясӧс рочӧн. Помкаыс ӧти: унджыкыс рочмӧмаӧсь да ас кывнас сёрнитӧны омӧля. Та понда и ас кывъяссӧ, и финно-угроведение сэні велӧдӧны рочӧн. Но некутшӧм велӧдан отсӧг ни туялан небӧг сэтчӧс небӧгкудйын абу. «Основы финно-угорского языкознаниясӧ» йӧзӧдлӧмаӧсь 32 во сайын нин, да сійӧс ӧні некутшӧм лавкаысь он нин ньӧб. И со Евгений Александрович гижӧма рочӧн татшӧм велӧдчан небӧгсӧ.

Сэні некымын юкӧн, эм водзкыв, финн-угор кывъяс йылысь серпаса юӧръяс, висьталӧма урал вужкыв выльмӧдӧм йылысь, сёрнитан шыяссӧ, кывсикасъяссӧ, налысь артманногсӧ да вежӧртассӧ восьтӧма ясыда да стӧча. Кыввор йылысь юкӧныс юӧртӧ миянлы подув-муысь йӧзсикаслӧн оласног да важ эскӧмъяс йылысь.

Евгений Александрович сетӧ ордвуж войтыръясӧс бӧръяысьсӧ гижалӧм серти лыдпасъяс, на серти унджык финн-угорыс чинӧма ӧні демократияногса Россияын. Содӧмаӧсь сӧмын йӧгра да яран, кызвыннас сы вӧсна, мый сэтчӧс войвывса вужвойтырлы сетӧны быдсяма кокньӧдсӧ. Та вӧсна и Ханты-Манси автономияын олысь вель уна коми морт асьнысӧ гижӧмаӧсь хантӧн либӧ мансиӧн.

Небӧг помас вайӧдӧма и вӧзъяна литература, лыддьӧг, код подув вылын студентъяслы позяс сэсся аслыныс гижны курсвывса да диплом уджъяс.

Ясыда тыдалӧ, мый Сыктывкарса канму университетысь вӧвлӧм профессор Е. А. Игушев аддзӧма ассьыс ин и Из сайын, сійӧ оз сӧмын туяв ордвуж кывъяс, но и отсалӧ быд ногыс кыпӧдчыны том хантлы да мансилы, велӧдӧ найӧс, зіля дасьтӧ та могысь колана бур небӧгъяс.