БЫДӦН БӦРЙӦ АССЬЫС

Коми Республикаын уналы тӧдса Сергей Елфимовлӧн нимыс. Сыктывкарса канму университетын велӧдчигас на сійӧ вӧзйывліс выль коми кывъяс. 1994-ӧд воын войтырсикас делӧяс министерствоӧн йӧзӧдӧм 1 №-а юӧр гижӧдӧ сыӧн вӧзйӧм вель уна кыв вӧлі пыртӧма. Писькӧс том морт сэсся велӧдчӧма Питерын лютеран вичкоса вежа айӧ да мыйтакӧ кад уджалӧма Давпонын, сэтчӧс вичкоын. Сэні сійӧ служитӧма комиӧн, вуджӧдӧма да йӧзӧдӧма комиӧн Лютер эскӧмсикасса катехизис, пыртӧма сэтчӧ вель уна выльтор, вичкоса аслыспӧлӧс коми терминология. Сэсся эновтчӧма тайӧ уджсьыс да мунӧма ас визулӧдыс.

Дыр кад тайӧ коми вежӧра морт йывсьыс ме немтор эг тӧдлы, эг кывлы, но неважӧн сійӧ петкӧдчис: вайӧма Коми наука шӧринса Кыв, литература да история институтӧ ассьыс выль вӧзйӧмъяссӧ. Коми лыддьысьысь, кывтуялысь, велӧдысь вермас ачыс видлавны да донъявны тайӧ кывъяссӧ. Вайӧда найӧс татчӧ анбур арт серти.

Бидзоль — бенгальский огонь

Бикӧтш — гирлянда

Бурасьтӧм — непримиримый

Бурасьтӧмлун — непримиримость

Ваувпыж — подводная лодка, субмарина

Вирпас — группа крови

Ваним — гидроним, наименование водных объектов

Выйпу — оливковое дерево

Вынмӧдчӧм — гимнастика

Вичкосир — ладан

Вежавый — елей

Вузвӧзйысь — торговый агент

Вӧзйӧгасьысь — рекламный агент

Вӧзйӧг сетысь — рекламодатель

Вугтор — скрепка

Донтас — премия

Донтаса морт — лауреат премии

Идӧгас — апостол

Идӧгасавны — быть апостолом

Кыланлун — чувствительность

Kиныр — хобот

Кодясьӧм — пантомима

Кодясьысь — пантомим

Кытшкола — цирк

Кывсетчӧм — соглашение

Кагайӧр — детские ясли

Ловсям — психика

Ловсям веськӧдӧм — психиатрия

Ловсям веськӧдысь — психиатр

Ловсям туялӧм — психология

Муморт — гном

Мувыв туялӧм — география

Нянидз — макарон(ы)

Пиньзу — зубная щётка

Синпештан — экран

Синвеж — очки

Сорнур — салат

Тунапас — гороскоп

Ӧшан — весы

Сергей Елфимов коми кыввор озырмӧдӧмӧ пуктіс нин вель ыджыд пай 1990-ӧд воясӧ. Зільӧ вӧлӧм сійӧ и ӧні. Да сымда выль ног шуана кыв вӧзйӧ сійӧ, мый йылысь позьӧма висьтавны коми ног, миянлы лӧсялана ногӧн. Дерт, гашкӧ, оз став вӧзйӧмыс во сьӧлӧм вылас быдӧнлы, но кодлыкӧ мыйкӧ, кыв шутӧг, лӧсялас. Быдӧн бӧрйӧ ассьыс, шулӧны тай. Тайӧ ставыс сетӧ лача сы вылӧ, мый коми кывлӧн ловзьӧмыс да паськалӧмыс оз сувт, сійӧ мунӧ водзӧ.