ИЖКАРЫН НЭММӦДӦМАӦСЬ ПЕЛЬМЕНЬ, А СІДЗЖӦ КРОКОДИЛӦС ДА КУЗЕБАЙ ГЕРДӦС
Кутшӧм сӧмын казьтылана пасъяс оз лӧсьӧдавны ӧнія Россияын! Позьӧ кӧть кодӧс либӧ кӧть мый нимӧдны изйын, гипсын, кӧртын. Со Сыктывдін районса Выльгорт сиктӧ сувтӧдӧмаӧсь сигудӧк вӧчалысь Семён Налимовлысь казьтылан мыгӧр.
«Коми му» газетын неважӧн Мария Плоскова йӧзӧдліс сылысь фотосерпассӧ. Ӧдвакӧ буретш татшӧмӧн вӧлӧма ыджыд киподтуя коми мортыс, сувтӧдӧмаӧсь тай изйысь вӧчӧм быттьӧ кутшӧмкӧ повзьӧдчантор. Тӧдӧмысь, абу и юасьлӧмаӧсь йӧзыслысь, воас оз сьӧлӧм вылас мыгӧрыс сыктывдінсалы, выльгортсалы...
А мукӧд дінмуясас оз сувтӧдавны тешкодь памятник-пасъяссӧ? Та йылысь позьӧ висьтыштны Удмуртияысь юӧръяс тӧд вылӧ босьтӧмӧн.
Удмурт мувывса Ижкар юркарын неважӧн сувтӧдӧмаӧсь кык тешкодь казьтылан пас-мыгӧр: ӧтисӧ кутшӧмкӧ ресторан водзын — пельменьлы, мӧдсӧ ӧти школа йӧрын — крокодил-мортлы. Воддзасӧ вӧчӧма сэтчӧс том скульптор Алексей Шкляев — кыпӧдӧма метр джуджда ыджыд пельмень, ӧд тайӧ важ, нэмӧвӧйся сёянтор. Удмурт ногӧн пельмень кывйыс юргӧ Комиын моз жӧ. Сэсся сёрӧнджык нин важ пермянасянь, коми да удмуртъяссянь рочьяс велалӧмаӧсь вӧчавны тайӧ пӧтӧса вӧлӧгасӧ, весигтӧ и нимтӧмаӧсь нин сійӧс роч пельменьӧн, кӧть и тайӧ абу налӧн нэмӧвӧйся важ сёянтор. Тадзи тшӧтш лоӧма и пывсянӧн, рочьяс дорӧ сійӧ вуджӧма сёрӧн жӧ финн-йӧгра войтыръяссянь.
Скульптор Асен Сафиуллин вӧчӧма крокодил юра пукалысь мортӧс. Дзик пыр жӧ чужӧма мича легенда: коді пӧ сылысь кисӧ кутыштлас, став гуся кӧсйӧмыс быть збыльмас. Ижкарӧ воысьяс зільӧны жӧ волыны тайӧ крокодил юра дивӧ дорас, фото-серпасасьӧны сы дорын, сур юӧны, кисӧ сылысь кутлӧны.
Сэк жӧ Ижевскын эз сувтӧдлыны ни ӧти удмурт гижысьлысь казьтылан мыгӧрсӧ. Кӧть вӧлі и В. И. Ленинлы, А. С. Пушкинлы да мукӧдлы. И со нимкодь юӧр: 2005 вося вӧльгым-ноябрын сэні сувтӧдӧмаӧсь удмурт литературалы подув пуктысь Кузебай Гердлысь мыгӧрсӧ. И абу кытчӧкӧ, а президент керкасянь пӧ неылӧ, карса шӧринас. Удмуртъяслы Кузебай Гердыс сэтшӧм жӧ дона классик, кыдзи миянлы Нёбдінса Виттор да Тима Вень, Илля Вась да Иван Куратов. Татшӧм со памятникъяс сувтӧдӧмаӧсь кольӧм во Ижкарын.
