ВОЙНА КАДСЯ

Неважӧн юркарса «Полиграф-Сервис» типографияын петіс аслыспӧлӧс небӧг: «Коми книга военного времени (1941–1945 гг.)». Гижӧма сійӧс Сыктывкарса государственнӧй университетысь профессор Лариса Павловна Рощевская.

Небӧгас некымын юкӧн. Водзкыв бӧрас — политика, литература, велӧдан, туялан, серпаса литературалы сиӧм торъя юрпасъяс. Гижысь пыдісянь видлалӧма Айму вӧсна Ыджыд тыш кадӧ Коми небӧг лэдзанінын уджсӧ, война кадся сьӧкыдлунъяссӧ да уна мукӧдтор.

Шензьӧдӧ ӧтитор: сьӧкыд тыш кадӧ став дзескыдлун вылас видзӧдтӧг йӧзӧдлӧмаӧсь коми кывъя небӧгсӧ ӧнія дорысь и унджык сикасӧс, и ыджыдджык лыдӧн. Шуам, война пансян 1941-ӧд воӧ петӧма 83 коми небӧг, 1942-ӧдас, Сӧветскӧй Союзлы медсьӧкыд тышкасян воас, петӧма 44 небӧг, 1943-ӧдӧ — 42, 1944-ӧд воӧ — 30, Ыджыд Вермӧм шедӧдан 1945-ӧд воӧ — 32 йӧзӧдӧмтор.

Со кутшӧм ыджыд тӧжд вӧлӧма коми кыв вӧсна сэкся сьӧкыд кадӧ. А ӧні? Сідз, 2000 воын Коми небӧг лэдзанінысь петӧма коми кывъя сӧмын 20 небӧг, а сыӧдз и нӧшта на этша. 2004-ӧд воын петавлӧма 7 небӧг — куим небӧг комиӧн да нёль рочӧн.

Мый кӧть эн шу, Л. П. Рощевскаялӧн книгаас эм зэв уна колана юӧр Айму вӧсна Ыджыд тыш кадӧ Комиын небӧг лэдзӧм-дасьтӧм йылысь. Вӧзъя лыддьыны.