КОМИ ШУӦ «КАРАБ»
Нимкодьпырысь видзӧді йирым тӧлысь 10-ӧд лунӧ «Синдбад-саридзті ветлысь» комиӧдӧм ворсан кино.
Таӧдз 5–6 во сайын коми кывйӧ вӧлі вуджӧдӧма «Исус» фильм, Енмӧ эскысь котыръяслӧн сьӧм вылӧ вӧлі тайӧс вӧчӧма. Ичӧт дырйи видзӧді «Чапаев» да «Ленин октябрын» кинояс, сэні гижӧдъяссӧ 60-ӧд воясӧ вӧлі комиӧн на сеталӧны. Но выльлунӧ петкӧдлӧмторйыс бурджык на лыддьӧдлӧмаяссьыс. Ӧти-кӧ, дублируйтӧмаӧсь бурджыка, лӧсяланаджыка. Мӧд-кӧ, тайӧ ветлысь-мунысь йывсьыс киноыс нималӧ мусяр пасьтала, сідзкӧ, сійӧс видзӧдасны унджыкӧн, верстьӧ и том йӧз. И челядьлы тайӧ бурсьыс-бур козин лои. Колӧ аттьӧ шуны ГТРК-салы водзмӧстчӧмсьыныс.
Гоз-мӧд кыв комиӧдӧм йывсьыс шуны колӧ. Вуджӧдӧма гӧгӧрвоана, пыртӧма и оланпас, эскӧданпас да мукӧд выль кыв. Дерт, вуджӧдӧма роч кыв дорӧ вывті нин матӧ, сёрникузя тэчассӧ позис вежыштны, коми дорӧ матӧджык мед вӧлі. Вывті уна сложнӧй сёрникузя бергалӧ. Сэсся ӧткымын босьтӧм кыв пыдди позис и комиӧс вайӧдны, шуам, деньга пыдди сьӧм. Ӧти кыв кузя эм вӧзйӧм, корабль пыдди пыртӧй коми сёрнисикасъясын да мойдъясын бергалан караб. Тадзисӧ комиджык лоӧ, ӧд нэмыс нин тайӧ грек кывйысь роч пыр босьтӧмторсӧ коми йӧз вежӧмаӧсь ас ногыс, ӧд карабтӧ и шуан кокниджыка. Роч кывйын бӧръя -бль- тэчассӧ шуигӧн кывтӧ позьӧ песовтны, торйӧн нин сы дорӧ суффиксъяс содталӧмӧн — корабльса, корабльлӧн. А вот карабса да караблӧн кывпертасъяс шуан кокниа, мытшасьлытӧг. Дай комияс ыджыд пыжсӧ век шулӧны карбас.
Тешкодь, но 2000 воын йӧзӧдӧм «Коми-роч кывчукӧрын» караб кывйыс абу, кӧть эм сэні караван кыв. Сетӧма корабль, сыысь кындзи сэсся мукӧд сёрнитан кывсӧ абу вайӧдӧма. Ме ичӧтдырсянь век кывлі караб да чайта, сійӧнджык и колӧ вӧдитчыны да бытьӧн пыртны кывсӧ водзӧ лӧсьӧдлан кывкудъясӧ. «
Дерт, телевидениеын зільысьяс и водзӧ пондасны комиӧдны киноястӧ. Бур эськӧ вӧлі, петкӧдлытӧдзыс кӧ найӧ аддзысьласны да сёрнитасны кыв туялысьяскӧд. Сэки фильмъясыс артмасны нӧшта бурджыкӧсь, видзӧданаджыкӧсь. И геройяс кутасны сёрнитны сӧдз, сӧстӧм коми кывйӧн...
