ВОЧА КЫВ ЛОАС

Лыдди «Войвыв кодзув» журналса юралысь редакторлысь «Аттӧ дивӧ!» неыджыд гижӧдторсӧ («Коми му», май 21 лунся) да ас пайысь чуйми: редактор шензьӧмӧн юасьӧ, мыйла пӧ ми Л. М. Безносиковакӧд гижим докладнӧй О. Уляшев да «Войвыв кодзув» вылӧ, мыйла корим артсӧ лӧсьӧдны?

Апрельса номерын О. И. Уляшев збыльысьсӧ гижӧма «Выль кыввор» кывкуд вылӧ лёкӧдана гижӧд, зэв омӧльтана ногӧн донъялӧма и миянӧс, небӧг гижысьясӧс. Та выйӧдз лоӧма, мый Люция Михайловна Безносикова аслас 65 арӧс тыртан лун кежлас журналлӧн татшӧм «козин» бӧрас ёна висьмыліс. Неморт нога лёкӧдӧмъяссьыс, дерт. И восьсӧн жӧ шуам Михаил Андреевичлы: миян эм инӧд (право) дорйыны ассьыным бур нимӧс. Журналӧ воча кывйыс быть лоас, кӧсйӧмсьыс огӧ эновтчӧй, дерт.

Мыйла гижим кабаласӧ М. А. Елькинлы петкӧдлытӧг? Коланлуныс та вылӧ эз вӧв. Журналса асьныс тай миянлы эз жӧ петкӧдлыны Уляшевлысь уль пӧжассӧ. Чайта, веныс оз на помась сӧмын тайӧн. Кад нин воис паськыдджыка сёрнитны-донъявны миян коми журналистикалысь ӧнія уджаланногсӧ. Редакторъяс ӧд оз асланыс сьӧм вылӧ лэдзны газет-журналъяссӧ, республика тшӧт весьтӧ. Тшӧтш и миян удждонысь босьтӧм сьӧм вылӧ.