КЫВКӦРТӦДЫС СЬӦД

КРТК-лӧн апрель 11-ӧд лунся «Сьӧда-еджыда» уджтас эз ёна во меным сьӧлӧм вылӧ. Тайӧ пӧрйӧ сійӧ вӧлі кык юкӧна. Воддзаас дженьыдика видлалісны сиктса медицинаысь дзугъяс, мӧдас донъялісны «Выль кыввор» да юасисны коми йӧзлысь, ошкӧны-ӧ найӧ выль коми кывъясӧн вӧдитчӧм.

Дерт, видзӧдласъяс торъялісны. Ӧтияс ошкисны, мӧдъяс кулитісны. Буретш уджтаслӧн тайӧ мӧд юкӧныс и парскис менам сьӧлӧмӧ.

Помкаяссӧ висьтала. Ӧти-кӧ, кывкудсӧ некымынысь матысянь петкӧдлісны телевизорӧд, но эз весиг казьтыштны гижысь-дасьтысьяссӧ. Кыв туялысьясӧс, буракӧ, журналистъясыд оз ёна пыдди пуктыны.

Мӧд-кӧ, небӧгсӧ донъялысь коми йӧзлы сёрнитнысӧ зэв этша кад вӧлі сетӧмаӧсь.

Ассьыс видзӧдлассӧ некод весиг подулавнысӧ эз удит. Журналист Светлана Некрасова менсьым сёрниӧс гижис 10 минут, а эфирас сетісны сӧмын минут джын. Кулӧмдінса кывбуралысь да журналист Василий Лодыгин кык-ӧ-куим кыв жӧ удитіс шуны, кӧть эськӧ буретш сійӧ татшӧм кывъясыслы выль олӧм сетысьясысь ӧти да налысь вежӧртассӧ паськӧдысь.

Коймӧд-кӧ, уджтассӧ нуӧдысь Иван Шахов Саваоп сар моз ӧтторъя висьталіс ассьыс помшуӧм, выль кывъясыс пӧ дзик гӧгӧрвотӧмӧсь. Кывкудъяс, тыдалӧ, нырсӧ абу и сюйлӧма. Василий Григорьевичлысь гижӧдъяссӧ кӧ, шуам, тӧд вылӧ босьтны, абу став выльпыртӧмыс ковтӧм да гӧгӧрвотӧм. Да и кывкудсӧ ми чукӧртім коми гижысьяслӧн да журналистъяслӧн уджъяс вылӧ подуласьӧмӧн. Кыдзи нӧ 1700 кывйыс вермас лоны ковтӧмӧн Геннадий Юшковлы, Иван Тороповлы, Владимир Тиминлы, мукӧдлы?

Чайта, журналистъяслы оз ков ыстысьны «йӧзлӧн» видзӧдлас вылӧ. Йӧзыд уна пӧлӧсӧсь, и оз ӧткодя найӧ мӧвпавны.

Шуам, выль кывъяс пыртӧмсӧ ошкисны Кулӧмдін сиктса войтыр, челядь да верстьӧ.

«Выль кыввор» йылысь эськӧ паськыдджыка колӧ сёрнитны, оз 7 минута уджтас джынйын — кыккокйыв ӧтиторйысь мӧдторйӧ чеччаліг да мӧвпышттӧг кутшӧмсюрӧ кывкӧртӧд вӧчаліг.

Бӧръя куим воӧн коми газет-журналысь да серпаса гижӧдъясысь удайтчис чукӧртны вель уна выль кыв. На пӧвстын — важдыр (история), выльпыртӧм (нововведение), оланподув (закон жизни), ӧтмунӧм (движение), петас (выпуск), юрвеж (память) да уна мукӧд. Оз-ӧ нин тайӧ висьтав выль кывъяслӧн коланлун йылысь?

Окота эськӧ, мед том тележурналистъяс аслыныс пель саяс мыйкӧ сюркняласны, асьныс мыйӧкӧ велӧдчасны. Медвойдӧр, дерт, сиа бура уджавны да йӧзӧс пыдди пуктыны.