ВӦВЛЫТӦМ НА УДЖ

Киӧ неважӧн веськаліс ӧти зэв тӧдчана небӧг — 2003 воын нин Венгрияын, Сомбатхей карын йӧзӧдӧм «Коми-венгр кывчукӧр». Гижӧма сійӧс том коми морт Николай Кузнецов, искусствояс гимназия помалысь, Венгрияын да Эстонияын дыр кад нин олысь-велӧдчысь.

Кывкудйӧ сійӧ пыртӧма 8.000 юркыв да вайӧдӧма венгр кывйысь весьтасъяс, пыртӧма и уна кывтэчас, зумыд шуӧм, дженьыдик сёрникузя. Бурторйыс сійӧ, мый йӧрышас пыртӧма уна сёрнисикас да выль кыв (шӧрин, асэмбуралӧм, оланпас, уджтас). Сӧмын мыйлакӧ абу пасйӧма, мый тайӧ кывворыс абу на тырвыйӧ пырӧма уна йӧз сёрниӧ. Сідзжӧ ковтӧг пыртӧма вель уна роч кыв (райком, райисполком, совхоз, аэростат да с.в.).

Николай Кузнецов вӧчӧма вӧвлытӧм на удж. Ӧні быд венгр вермас кокниа велӧдны миянлысь кывнымӧс, лыддьыны литература, газет-журнал, а туялысьяс — ӧткодявны ыліса ордвуж — коми да венгр — кывъяс. Жаль сӧмын, миян республикаын татшӧм кывкудйыс лыда.