ТАТШӦМ ОЗЫР МУАС...
Неважӧн сюрис син улӧ ӧти яръюгыд серпасъяса небӧг — 2004 воын Кеннет Миккоӧн лӧсьӧдӧм-вӧчӧм фотоальбом, нимыс сылӧн «
Ачыс Кеннетыс олӧ войвыв Швецияын Хапаранта карын да лэдзӧ ассьыс журнал. Волӧма нин Комиӧ водзджык да сэсся сылӧн чужӧма мӧвп ветлыны республика пасьтала мотоциклӧн, сэсся дасьтыны аслас синвидзӧдласа серпасъяс йывсьыс торъя небӧг. К. Миккоыс тшӧтш и бур фотограф да зільӧма унатор нэммӧдны снимокъясын.
«Арт» журналса редакция да республикаса Юралысь отсӧгӧн Швецияысь тайӧ мортыс волӧма Сыктывкарӧ, да тані и ньӧбӧмаӧсь сылы юркарса базарысь «Иж-Планета–5» мотоцикл, сы вылын сэсся и петӧма туйӧ. Вуджӧма ӧти гожӧмӧ уна туйвеж. Мунан туйыс татшӧм вӧлӧма: Сыктывкар — Пасвомын грезд — Кулӧмдін — Дон — Ухта — Ираёль — Уквавом — Изьва — Ыб (Сизябск) — Чилимдін — Печора — Усинск — Воркута. Дерт, мотоциклнад та мында мунӧм бӧрад унатор сылӧн юрас пырис, юрвежас колис. Небӧгас сетӧма медводз фотосерпасъяс, унатор и гижӧма.
Снимокъясыс уна рӧмаӧсь, мичаӧсь, серпасалӧма дзик быдтор: помтӧм вӧр, туйяс, паськыд юяс, сикт-каръяс, быдсяма йӧзсӧ. Кыдзи ачыс Кеннетыс пасйӧма, Комиын сійӧс унатор шензьӧдӧ, быд лун пӧ гӧгӧрвотӧмтор аддзан: туйясыс кызвыннас тыртӧмӧсь, некутшӧм туй индалысь пас тшӧкыда абу, ылі пельӧсъясын йӧзыс олӧны гӧлиника, ас вынӧн да овмӧсӧн, вӧрӧн-ваӧн кынӧмпӧтсӧ перйӧны, унаӧн уджтӧмалӧны. Шензьӧ водзӧ, та дырйи пӧ кыпыд сьӧлӧмаӧсь, ӧта-мӧдныслы век отсасьӧны, лёкӧ оз сетчыны, дерт, кызвыныс.
Татшӧм туйвыв пасйӧдъяса фотонебӧгыс миян Комиын эз на и вӧвлы. Неуна и олӧма Швецияса журналист миянын, а тӧдмалӧма-казялӧма татчӧс уна депутат-журналист дорысь унджык на.
Шуам, Изьва сикт пӧ воддза волӧмсяньыс сизим воӧн абу и вежсьӧма, кадыс пӧ быттьӧ сувтӧма, сійӧ жӧ киссьӧм туйкерка, оз сӧвмы олӧмыс и сиктъясын: ӧтувъя овмӧсъяс вальдӧны, сьӧм серсӧ колхозъясын уджалысьяс оз аддзывны. «50 лет Победы» колхозса юралысь Ирина Королёва, том специалист, норасьӧ, Россия пӧ некыдз оз сӧвмӧд ни пык видз-му овмӧстӧ, а Сыктывкарысь чина йӧзлысь чужӧмбансӧ пӧ татысь эг нин аддзывлӧй уна во. Дзоньнас коми сиктъяс йылысь журналистлӧн кольӧмаӧсь кызвынсӧ бур казьтылӧмъяс. Олӧны пӧ оз озыра, но морт ногсӧн на.
Каръяс йылысь — мӧдарӧ. Унатор сійӧс падмӧдӧма, весигтӧ йӧзыс пӧ скӧрджыкӧсь, а войвывса каръяслӧн фотоясысь тыдалӧны ӧти пӧлӧс мисьтӧминик керкаяс, укшальмӧм уличьяс, сӧмын Ухта йылысь видзӧдласыс неуна бурджык. Торйӧн нин шуштӧм-мисьтӧм пӧ Печора кар, а Усинскын кӧть и озырӧсь индустрия овмӧсъясыс, йӧзыс мыйлакӧ вель скӧрӧсь. Ӧттшӧтш Коми мулӧн озырлуныс тыдалӧ матӧ быд снимокысь: тайӧ и вӧр, и чери, и мусир-биару, кӧръяс, дона куяс. И татшӧм озыр муас йӧзыслӧн сэтшӧм торъялана, а корсюрӧ ёна майшӧдлана-зэлӧдчана олӧм.
Ӧти кывйӧн кӧ, тайӧ фотонебӧгыс зэв ёна торъялӧ официальнӧй видзӧдлас подув вылын лӧсьӧдӧм-вӧчалӧм фотоальбомъясысь. Ӧд найӧс миян республикаса фотографъяс да журналистъяс лӧсьӧдӧны кыдзи рекламаса плакатъяс, мича открытка сяма татшӧм «пӧжасъясыс» оз петкӧдлыны ӧнія республикалысь збыль чужӧмбансӧ. А Кеннет Микколӧн фотонебӧгыс унаторйӧн бурджык, сибыдджык да сьӧлӧмаджык артмӧма.
