ЧУЖАН КЫВЙӦН ЙӦЗӦДНЫ
Тавося сьӧкыд, «карнана» висьӧм лёкалан кадӧ (тадзи коми йӧз ас ногыс нимтӧмаӧсь COVІD-19 пӧрӧссӧ) Коми муын лоины тшӧтш и бур вежсьӧмъяс. На лыдӧ пырӧ выль коми журнал панӧм, сылысь медводдза номер лэдзӧм.
Выль петаслӧн нимыс — «Коми филология», дасьтӧны сійӧс Сыктывкарса канму университетысь Гуманитарнӧй наукаяс институтын коми да фин-угор филология да регионоведение кафедраын зільысьяс, шӧр редакторалӧ филологияса кандидат, доцент Елена Васильевна Остапова.
Татшӧм выльпыртана воськолыс зэв колана, ӧд коми филологъяслы чужан кывйӧн ассьыныс уджъяссӧ йӧзӧдны вӧлі сьӧкыд. Вель дыр петіс «
Абу гусятор: «Войвыв кодзув» да «Арт» журналъяс эськӧ и корӧны комиӧн гижны туялан статьяяс, но писка редакторъяс оз на зэв окотапырысь йӧзӧдны вӧзйӧм уджъяссӧ.
Тайӧс ачым зэв бура тӧда, шуам, куйлӧны индӧмъясысь ӧтиас менам гижӧдъясӧй вояс чӧж. «Коми филологияын», чайта, татшӧм ышнясьӧмыс оз ло.
Выль журналыс ӧтувтӧ став коми филологсӧ, Коми муысь и Перым дормуысь, тшӧтш и мудор сайысь. Тайӧ тыдалӧ и редакцияса ӧтъёрта котырысь, кытчӧ Сыктывкарысь филологъяскӧд тшӧтш пырӧны и Перымса педагогика университетысь доцент, перым-коми ань Алевтина Степановна Лобанова да Эстонияысь Тартуса университетын финноугристика да коми кыв велӧдысь Николай Владимирович Кузнецов.
Журналлӧн медводдза петасӧ пыртӧма 19 статья, найӧс гижысьясыс — кывтуялысьяс (О. Н. Баженова, Н. И. Ваттулева, В. М. Лудыкова, Г. А. Некрасова, Г. В. Пунегова, О. И. Некрасова да мукӧд), коми литератураӧ да фольклорӧ пырӧдчысьяс (Н. В. Горинова, Е. В. Ельцова, Г. К. Лисовская, Е. В. Остапова, А. Н. Рассыхаев да мукӧд). Быдӧн гижӧ аслас тема серти, сетӧ лыддьысьысьяслы выль тӧдӧмлунъяс да восьтӧмторъяс.
Вӧзъя чужан кывъя культура пыдди пуктысьяслы лыддьыны выль журналыслысь медводдза петассӧ.
Сэк жӧ колӧ гарыштны гижӧдъясас ӧткымын шыбӧль йылысь: эмӧсь опечаткаяс, посни сорсьӧмъяс, а кӧнсюрӧ шӧр редакторлӧн ёсь карандашӧн зільӧмыс озджык на тӧдчы. Туялан гижӧдсӧ ӧд дасьтӧны филологъяс, налӧн кывкутӧмыс зэв колана буретш татшӧм уджъяссӧ дасьтігӧн.
Кӧнсюрӧ казялан ӧти и сійӧ жӧ кывйӧн вӧдитчӧм, синоним абутӧмлун. Шуам, В. М. Лудыкова аслас статьяын действие кывйӧн вывтіасьӧма, шуам кӧть, «Шӧр кадакывйыс нимтӧ действиесӧ, а изобразительнӧйыс либӧ звукоподражательнӧйыс донъялӧ действиесӧ, тӧдчӧдӧ шӧр действиесӧ, сы пыр сёрнитысьыс петкӧдлӧ действие дорас ассьыс отношениесӧ». Дерт, позис паськыдджыка вӧдитчыны действие дорӧ синоним туйын ас коми керӧм кывйӧн.
Е. В. Ельцова дасьтӧма «Вылыс Човса дневник — Тима Веньлӧн медбӧръя гижӧд» удж, кытысь ньӧтчыдысь он казяв выльпыртана луннебӧг, сӧмын дневник кывйӧн статьясӧ суктӧдӧма.
Татшӧм ӧтпӧлӧслуныс авторъяслысь кывсӧ некыдзи оз мичмӧд.
Лача кутам, журналлӧн выль петасъясын татшӧмторйыс оз нин ло. Сиа Елена Васильевна Остаповалы водзӧ зільны «Коми филология» йӧзӧдан уджас да мед войтырсикас политика министерство водзӧ отсалас журналсӧ йӧзӧдны сьӧмӧн.
