МЫЙ ШУИСНЫ КОММУНИСТЪЯС КОМИ КЫВ ЙЫЛЫСЬ

Войдӧрлун (10-ӧд декабрын) Сыктывкарса коммунистъяслӧн вӧлі чукӧртчылӧм (собрание), вӧліны бокӧвӧй йӧз. Сэні т. Шахов вӧчис доклад, кыдзи олӧмӧ пуктыны 12-ӧд коммунист партияса съездлысь шуӧмсӧ мӧд пӧлӧс сёрниа йӧз йылысь, — мӧд ногӧн кӧ шуны: кыдзи лӧсьӧдны Коми Обласьтӧ коми кыв, мед ӧдйӧджык кыптасны коми йӧз, коми овмӧс.

Шахов ёрт висьталіс зэв дыр, висьталіс ставсӧ лючки, гӧгӧрвоисны быдӧн (мыйсюрӧ вӧлі нин миян воддза газетъясын). Медъёна сёрнитісны учрежденньӧяс комиӧ пӧртӧм йылысь. Бура дыр вензисны. Сэки висьтавлісны ёртъяс: Торлопов, Терентьев, Дерябин, Липин, Потапов, Карапов, Михайлов.

Быдӧн шуисны, коми йӧзӧс пӧ кыпӧдны, Коми муысь овмӧс лӧсьӧдны вермам сӧмын коми кывйӧн. Коми йӧзлы Сӧвет власьт сэки лоас ещӧ на тӧдса, ещӧ на матӧджык сибалас. Став комиыс сэки вӧрзяс, гызяс, кыптас.

Кыкӧн сӧмын, т. Терентьев (Изьваысь) Потаповкӧд шуисны, водз на пӧ коми кыв сюйны учрежденньӧясӧ. Налысь эз кывзыны да примитісны резолюция: мый пӧ босьтчӧма вӧчны Обком РКП Обисполкомкӧд та йылысь — ошкыны, водзӧ бур удж нуӧдны. Коми кыв кедзовтӧмысь дугӧдны.

Сыктывкарса коммунистъяс (уна на пытшкын рочьяс) тӧдӧны: коми йӧз вермасны ёнджыка овмӧсӧ кутчысьны, регыдджык югдыны, мукӧд йӧзӧс (водзын мунысьясӧс) суӧдны сӧмын коми кывйӧн.

Мед нӧ тайӧ шуӧмыс регыдджык збыльӧ пӧрас! Мед коми йӧзлы аслас кыв пыр воссяс югыд выль олӧм!