СЬӦМ КЫРЫМАНЫД ЭНӦ КУТӦЙ

Вӧлӧсьтъясын крестьяна уна ногӧн нажӧвитӧны сьӧм. Сьӧмсӧ кутӧны кырыманыс, некытчӧ оз видзны. Чайтӧны: сьӧмыс чӧжсьӧ, кор ковмас — сійӧ жӧ дон вылӧ позяс быдсяматор ньӧбны, быдтор шедас. Важ кадӧ, дерт эськӧ, тайӧ вӧлі тадзи. Ӧні мӧд нога: сьӧм лунысь лунӧ донтӧммӧ. Шуам: талун пуд нянь сулалӧ 20 сё шайт, аски лоӧ нин сетны 21 сё либӧ унджык; сідз быд лун сьӧмыслӧн доныс чинӧ. Та ногӧн крестьяналӧн став мырсьӧмыс сьӧм нажӧвитӧм пондаыс весьшӧрӧ вошӧ. Найӧ та йылысь нинӧм оз тӧдны, оз гӧгӧрвоны.

Быд нажӧвитысьлы вӧлӧсьтъясын, мед налӧн нажӧткаыс весьшӧрӧ эз вош, оз ков сьӧмсӧ кутны кырымын, колӧ сійӧс пыр мыйкӧ вылӧ видзны: ньӧбны нянь, сёян-юан, паськӧм, дозмук, му уджалан кӧлуй, мукӧдтор. Ньӧбны кӧ нинӧм оз ков, медбур сьӧмсӧ пуктыны СБЕРЕГАТЕЛЬНӦЙ КАССАӦ; сэні пӧртӧны сьӧмсӧ зарни лыдӧ, доныс ньӧти оз чин; кор ковмас бӧр босьтны кутшӧмкӧ колантор вылӧ, сетасны тэныд босьтан лунся зарни курс (дон) серти. Шуам: зарни шайт (чӧлкӧвӧй) сулалӧ пуктігас дас вит сё, босьтан лунас доныс лоӧ нин кызь сё, тэныд кызь сё и сетасны. Сы кындзи, пуктӧм сьӧм вылӧ локтӧ прӧчент (содтӧд).

Либӧ нӧ позьӧ ньӧбны квайт прӧчента зарни заём (облигации 6% золотого займа). Сэн бара жӧ сьӧмыслӧн доныс оз чин, нӧшта пыр содӧ. Шуам: ӧні сійӧ сулалӧ сюрс шайт, тӧлысь мысти вермас содны кык сюрс шайтӧдз, унджыкӧ; сійӧ бара жӧ вайӧ прӧчент. Сэсся вермас усьны заём вылас чукӧра сьӧм (рочӧн — выигрыш) зарниӧн вит шайтсянь сё сюрсӧдз. Сэтшӧм чукӧра воӧмыс во чӧжӧн овлӧ кыкысь. Ӧти воын кӧ оз усь, вермас усьны мӧд воас, сідз кыссьӧ дас во чӧж. Ковмас кӧ сьӧм, заёмсӧ позьӧ вузавны, бӧр пӧртны сьӧмӧ либӧ закладуйтны.

Сберегательнӧй кассаяс ӧні сӧмын на эмӧсь каръясын, регыд, гашкӧ, восьталасны вӧлӧсьтъясын. Ылын кӧ нуны сьӧм кассаӧдз либӧ ачыд он эшты нуны, позьӧ чукӧртчыны унджыкӧн, сэсся ыстыны пӧпутчиккӧд. Сы ногӧн жӧ позьӧ бӧр босьтны сьӧм кассаысь, кор ковмас.

Тадзи кӧ вӧчасны крестьянаыд, сьӧмлӧн дон ньӧти оз чин, некутшӧм урон оз ло.

Коми пи.