ЗЕЛЕНЕЧЫН

Неважӧн (2 декабрын) ми ветлім Зеленечӧ крестьянакӧд сёрнитны. Пырим школаӧ. Школаас вӧлі чукӧртчӧмаӧсь том йӧз. Накӧд тшӧтш вӧліны велӧдысьясыс. Ме юалі: «Мый нӧ ті тані вӧчанныд?» — «Лыддьысям пӧ, велӧдам ӧтув, кыдзи бурмӧдны муяс-видзьяс, крестьяналысь олӧмсӧ». Зэв эськӧ бура учительясыс уджалӧны да, коми пемыд йӧзӧс бур вылӧ, выль ногӧн овны велӧдӧны да, сӧмын тай лыддьӧмсӧ кывзыныс оз волывлыны верстьӧджык йӧзыс...

Миян ӧти морт пыраліс Исполкомас. Председательыс висьталӧма сылы: «Налог пӧ миян пӧшти мынтӧма; сизимсё ветымын пудйысь коли сӧмын нелямын пуд. Крестьяна пӧ сӧвет власьт вылӧ оз шуасьны, оз норасьны. Сӧмын шуӧны, вывті пӧ ыджыд вӧр налог (леснӧй пошлина), вывті пӧ сійӧ сьӧкыд крестьяналы мынтыны. Сэсся норасьӧны хлебнӧй облигация вылӧ няньӧн пыдди деньгаӧн мынтӧмысь. Вывті пӧ этша сетӧны. Ми пӧ асьным донӧнджык босьтлім».

Зеленечын 630 олысь. Богослов заводӧ таво мунӧма 150 морт. Шпал лэдзны Северолеслы медасьӧма 200 морт, ставыс верстьӧ йӧз — 17 арӧссянь 50-ӧдз. Школаын велӧдчӧмыс мунӧ, позьӧ шуны, шогмана. Пес эм, сӧмын ичӧтджык, оз тӧр став челядьыс. Эм Нардом, уджыс сэн оз мун. Пескыс дай уджалысьыс абу.

Нардомыслысь ми нимсӧ вежим. Ӧні сійӧ мӧдас шусьыны лыддьысян керкаӧн. Тшӧктім асланым тшӧт вылӧ лӧсьӧдны пес. Кӧсйысим вайны карсянь нигаяс, газетъяс, мукӧд колантор.

Сэсся мыйӧн чукӧрмис йӧзыс, ми висьталім налы, кыдзи ӧні олӧны Германияын уджалысь йӧз, кытысь лоӧ зэр да шер, чард да гым, мый вӧсна коммунистъяс волывлӧны деревняӧ. Ставсӧ кывзісны зэв бура. Кор мӧдім мунны, крестьянаяс тшӧктісны волывлыны унджыкысь. Сэсся зэв бура колльӧдісны.

М. Торлопов.