ЧОЛӦМ КОМИ КӦЗЯИНЛЫ!

Видзӧдлам кӧ ми ӧні бӧрвыланым — асьным шензям: «Аттӧ жӧ дивӧ, — шуам, — кутшӧмӧсь нин ми ёнӧсь, кутшӧма водзӧ вешйӧма нёль-ӧ-вит воӧн олӧмыс!»

Збыльысь сідзи. Ёна водзӧ воськовтім, тӧдчӧмӧн водзӧ! Коми йӧз ӧні тӧдӧны нин — мый сетіс Сӧвет власьт крестьяналы. Тайӧ — зэв нин ыджыд воськов!

Миян ӧні эм асланым Коми Обласьт. Миянӧс Сӧвет власьт кок йылӧ сувтӧдіс, орччӧн став йӧзыскӧд, сетіс быдӧнкӧд ӧткодь права, восьтіс туй олӧм кыпӧдны, овмӧс паськӧдны, разис тшӧтш векӧвӧйся кӧртӧд коми вомысь — мездіс коми кыв. Со вермам нин ми коми олӧм дорысьяслы (съездлы) чолӧм видзны ас коми кывйӧн! Коркӧ нӧ, войдӧр, коми йӧз вермылісны думыштны та йылысь! Зэв уна бур вӧчис Сӧвет власьт. Ёна нин тшӧтш асьным велалім олӧмсӧ лӧсьӧдны.

Водзӧ кежлӧ ещӧ чорыда на лоӧ уджавны! Кӧть ми бура ёнӧсь нин, ёна нин бура олам ӧні, сӧмын абу на зэв озырӧсь. Ёна на ковмас пессьыны; ёна на колӧ овмӧс кыпӧдны, эмбур чукӧртны! Коми йӧз торъя нин гӧля пыр овлісны, миянлы ковмас чорыда на олӧм дорны!

Мед пыр водзӧ Коми Обласьтлысь овмӧссӧ бурмӧдны, коми йӧзлысь уджсӧ кокньӧдны, важ чукыльяс веськӧдны, бурджык туйӧд восьлавны — сы вӧсна и чукӧртчылӧны сёрнитны став Коми мувывса Сӧветъяслӧн съездъяс, отлаасьлӧны быд коми пельӧсысь бӧрйӧм йӧз. Тайӧ коймӧд съезд нин Коми Обласьтувса Сӧветъяслӧн.

Сёрнияс съезд вылын лоӧны гырысьӧсь (серьёзнӧй).

Мый вӧчсьӧ ӧні став му вылын, кыдзи сы вылӧ видзӧдӧны коми йӧз.

Мый вӧчӧма Обласьтувса Исполнительнӧй Комитет, кодӧс воддза съездӧн пуктылісны ӧнӧдз юравны, удж нуӧдны.

Кыдзи мунӧны налогъяс, мыйла, кутшӧм, кытчӧ налогъясыс пырӧны. Та йылысь зэв бура ковмас сёрнитны. Ӧні Сӧвет власьт тшӧктӧ овны ас судзсьӧм серти быдӧнлы. Власьтӧн бергӧдлыны колӧ уна сьӧм, кытысь сійӧ корсьны миянлы, Коми Обласьтлы.

Кыдзи лӧсьӧдны бурджыка Сӧвет удж нуӧдны, мед этшаджык йӧзӧн вӧлі позьӧ веськӧдлыны (управляйтны) Коми муын, мед этшаджык сэтчӧ ковмис сьӧм.

Ёна лоӧ сёрнитны видз-му уджалӧм йылысь. Тайӧ миян медыджыд мог. Зэв на ми омӧля кужам видз-муӧн вӧдитчыны, уджалам лёк ногӧн. Сы вӧсна эмбур крестьяналӧн оз сод. Колӧ уджавны выль ногӧн.

Сёрнитны лоӧ велӧдӧм йылысь. Коми йӧз пемыда олӧны, вывті пемыда мукӧд дорысь! Сійӧн ми медся гӧльӧсь.

Кооперация йылысь, дерт, нин лоӧ сёрнитны. Ми некыдз огӧ вермӧй кыпӧдны кооперативъяснымӧс. Ковмас босьтчыны прамӧйджыка та дорӧ!

Уна, зэв унатор колӧ тайӧ съездлы вӧчны! Став сёрниыс лоӧ ӧти понда: овмӧс кыпӧдны, чорыда кутчысьны уджӧ, ӧтвылысь мунны рабочӧйяскӧд, велӧдчыны овны. Дерт, лоӧ чорыда шуны кыв-мӧд и коми кыв йылысь, сытӧг оз кыпав миян немтор!

Быд сёрни кузя ковмас тайӧ съездлы аддзыны туй, пасйыны — кыті кутасны водзӧ восьлавны коми йӧз.

Бурсиам Коми мувывса кӧзяинлы бура уджавны, коми йӧзӧс кыпӧдны!