КОМИ ГИЖЫСЬЯСЛӦН ЧУКӦРТЧЫЛӦМ

Четвергӧ вӧлі первойысь на чукӧртчылӧм коми гижысьяс секциялӧн. Волісны бура унаӧн. Медыджыд сёрни муніс секция Бюролӧн ӧнӧдз уджалӧм йылысь, мый удайтчӧма вӧчны учрежденньӧясӧ —

Коми кыв лӧсьӧдӧм йылысь.

Удж вӧчӧм йылысь висьталісны ёртъяс: Савин, Дерябин, Шахов.

Удж нуӧдӧмаӧсь бура ёна нин. Водзӧ кежлӧ уджыс тыдалӧ ещӧ на уна. Унджык уджсӧ, дерт, лоӧ вӧчны коми литература секциялы. Ковмас комиӧн гижны (роч вылысь) законъяс — сэтчӧ лоӧ пуктыны вывті уна удж! Шуисны корсьны коми кыв вылӧ вуджӧдысьясӧс (переводчики) газетын юӧртӧм пыр.

Воис карӧ нӧшта ӧтик коми уджалысь — Чисталёв Тима Вень Помӧсдінысь. Сылы пырысь-пыр чукӧртчылысьяс сетісны удж: лӧсьӧдны комиӧн канцелярияса кывъяс (кыдзи, примернӧ, шуны комиӧн: «циркуляр, обязательное постановление, отношение, воззвание, определение», мукӧдтор).

Коми газет — «Югыд туй» — лэдзны отсасьысьӧс сетны шуисны (ӧти мортӧс). Быдӧнлы таысь ӧприч тшӧктісны газетӧ гижны, мед эськӧ эз ор коми газетыс.

Сэсся пыр колӧ тӧждысьны коми кывсӧ (гижӧдсӧ тшӧтш) мичмӧдны, мед артмас шыльыд коми литература кыв.

Сиктса уджалысьясӧс (местнӧй служакъясӧс) комиӧн гижны велӧдӧм йылысь шуисны секция Бюролы чукӧртлыны торъя комиссия. Корны велӧдысьясӧс отсыштны местаяс вылас (сиктъясын) тайӧ ыджыд могыслы — велӧдны комиӧн гижны сэтчӧс уджалысьяссӧ.

Та бӧрын сэсся сёрнитісны

«Коми нига лэдзанінлы» куим во тырӧм йылысь.

Сылы эськӧ куим воыс тыри самӧй тайӧ чукӧртчылӧм лунӧ (6-ӧд декабрын). Нюжӧдны сэсся шуӧмаӧсь Обласьтувса съездӧдз, мед делегатъяс тшӧтш тӧдласны та йылысь. Лунсӧ эз на урчитны. Шуисны сэк кежлӧ лэдзны коми журнал — «Парма ёль», газет «Югыд туй», вӧчны «Коми литература рыт». Первойсӧ кӧсйӧны вӧлі вӧчны рытсӧ съездвывса делегатъяслы донтӧг (бесплатно), сэсся шуисны пуктыны быдӧнлы дон. Сьӧмыс тайӧ рытсьыс ставнас мунас В. Ӧ. Молодцов семьялы отсӧг вылӧ. В. Ӧ. Молодцов (Сандрӧ Васьӧ) зэв ёна уджаліс коми вӧсна, коми гижӧд вӧсна, сійӧ восьтліс куим во сайын «Коми нига лэдзанінсӧ» и. Ӧні ачыс сійӧ Крымын (лечитчӧ), ёна уджалӧмсьыс висьмис чакоткаӧн, семьяыслы зэв дзескыд овныныс.

Лыддисны та бӧрын Жан Морӧслысь (И. Чисталёвлысь) гижӧд —

«Критика „Выль туйӧд“ нига йылысь».

Зэв уна гижлӧма Жан Морӧс (висигас нин — Жан Морӧс тулыснас таво куліс) тайӧ коми нига йывсьыс! Велӧдӧма, кыдзи колӧ бурджыка, шыльыдджыка комиӧн гижны водзӧ вылӧ.

Коми гижӧд миян зэв на том, унаӧн гижигас мӧвпалӧны рочӧн, ёна сы вӧсна пырӧ коми гижӧдас роч ногыс (обороты, союзы). Колӧ пыр мичмӧдны, шыльӧдны коми гижӧдтӧ, весавны гӧгӧрвотӧм кывъясысь.

Медбӧрын сэсся шуисны

«Сыкомтевчук» кыпӧдны.

Комиӧн ворсӧмъяс (спектакъяс) дзикӧдз быри. Ӧти-кӧ, ворсысьыс абу, мӧд-кӧ — чукӧртныыс некодлы. Литература секция шуис: «Колӧ „Сыкомтевчук“ бӧр ловзьӧдны.» Тайӧ уджсӧ сетісны коми гижысьлы — «Жугыльлы» (Н. П. Попов).

Быдтор йылысь бура сёрнитісны чукӧртчылысьяс. Сёрни квайт час рытсянь нюжаліс вой шӧр гӧгӧрӧдз.

Помалісны комиӧн Интернационал сьылӧмӧн.