КОМИ МУЛӦН ОЗЫРЛУН

Миян Коми Обласьт 400 сюрс верст кузя пасьтала — Францияысь ыджыдджык. Олысьыс Коми муын сӧмын 200 сюрс морт, — ӧтик верст пасьтаын ӧти мортысь этша олысьыс (Францияын, ичӧтджыкинын, олӧны 39 миллион морт).

Став озырлуныс коми йӧзлӧн — ВӦР, вӧрыс Коми обласьтын 41 миллион десятина. Быд во содӧ (бур керйӧдз воӧ) 5 миллион пу. Колян гожӧм заграничаӧ нуисны Коми муысь 600 сюрс кер. Таво кӧсъям лэдзны ӧти миллион пу, — войнаӧдз заграничаӧ нулывлісны миллионӧн-джынйӧн.

Мӧд пӧлӧс удж коми йӧзлӧн — ВӦРАЛАН ПРӦМЫС. Колян во ставсӧ вӧлі кыйӧма-лыйлӧма зверсӧ — миллионӧн-джынйӧн (1.500.000). Куш урыс вӧлі миллионысь уна, сэсся кӧч, 10 сюрс сьӧдбӧж, 3 сюрс руч, 4 сюрс тулан, 4 сюрс низь (соболь), мукӧд пӧлӧс звер.

Таво на кӧсъям прӧмыс сы мында чукӧртны. Прӧмысъяс тайӧ воясӧ дона вӧліны: колян во став прӧмысыс вӧлі лоӧма миллион джын шайт дон (зарниӧн). Дона прӧмысла кокньыдджыка колян восӧ коми йӧз вуджисны. Таво бара няньяс, турунъяс зэр вӧсна омӧля воисны.

Сэсся миян Коми муын войвывланьын (Изьваын) кынӧмпӧт йӧзыс корсьӧны кӧр помысь. Миян кӧр видзан удж Америка серти омӧля на мунӧ. Америкаӧ (Аляскаӧ) рӧд вылӧ нулісны ӧтик кӧр стада — кӧкъямыс во бӧрти кӧр стада соді вит мында; миян кӧръяс век ӧтарӧ чинӧны: 1896 воӧ висьӧмъясысь чині 117 сюрс кӧр, 1907 воӧ бара уси 147 сюрс кӧр; ӧні сӧмын кольӧма став Коми Обласьтас 400 сюрс кӧр. Коми Обласьтувса власьт корӧ Сӧветса правительствосянь отсӧг — лӧсьӧдны кӧръясӧс лечитанінъяс (бактериологические станции). Ӧні кӧръясӧс видзӧм вӧсна Сӧвет власьт зэв бура тӧждысьӧ.

А. А. Ц.