ОБЛАСЬТУВСА УЧРЕЖДЕННЬӦЯСӦС КОМИӦ ПӦРТӦМ
Ноябр 27-ӧд лунӧ Обласьтувса учрежденньӧясӧс комиӧ пӧртан Комиссия водзӧ удж нуӧдӧм йылысь сёрнитӧм бӧрын шуис:
Медым кыпӧдны коми йӧзӧс, дзикӧдз сибӧдны найӧс Сӧвет власьткӧд, велӧдны тыр-бур вежӧрӧн овны, — колӧ власьтсӧ лӧсьӧдны гӧгӧрвоанӧс, быд учрежденньӧын сёрнитны-гижны ас кывйӧн, комиӧн.
Регыдӧн тайӧ вӧчны он вермы: миян асланым велӧдчӧм коми йӧз этша, лоӧ коравны уджавны мукӧд сёрниа йӧзӧс; мӧд-кӧ — комиясыс унаӧн на оз кужны гижнысӧ коминас (коми кыв вылас войдӧр омӧля вӧлі видзӧдӧны да, эз мӧвпыштлыны сійӧс велӧднысӧ). Сійӧн Комиссия шуис:
Ӧні вӧчны позян удж йылысь:
Тшӧктыны Волисполкомъясӧс кабалаяс гижавны комиӧн. Тшӧктыны быд учрежденньӧлы босьтавны комиӧн гижӧм кабалаяс, жалӧбаяс, прошенньӧяс, сідз водзӧ, налы воча гижны комиӧн жӧ; сэсся тшӧктыны найӧс став йӧзлы висьталӧм вылӧ ыстан гижӧдъяс (
Народнӧй судын да му йылысь судитчан комиссияясын выль восянь сёрнитны-гижны комиӧн. Тшӧктыны вӧлӧсьтса милиционеръясӧс выль восянь протоколъяс гижны комиӧн.
Учрежденньӧясӧс тшӧктыны лэдзны комиӧн Сӧвет власьтлысь выль законъяс (медвойдӧр видз-му йылысь, вӧр-ва йылысь, удж йылысь, сідз водзӧ).
Тшӧктыны Обоноӧс коми ичӧт школаясын велӧдны комиӧн, быд обласьтувса гырысь школаын велӧдны коми кыв; гырысь школаясын коми велӧдысьясӧс тшӧктыны велӧдны комиӧн (медъёна сійӧ колӧ сель.-хоз. техникумын). Водзӧ кежлӧ мырсьыны гырысь школаяссӧ пӧртны комиӧ. Обоноӧс тшӧктыны вӧчны смета школаяслы коми нигаяс ньӧбӧм вылӧ.
Коми нига лэдзанінӧс тшӧктыны корны Обисполкомлысь сьӧм коми нига лэдзӧм вылӧ да коми шрифт судзӧдӧм вылӧ.
Тшӧктыны коми служащӧйясӧс коми сиктъясӧд ветлӧдлігӧн удж нуӧдны комиӧн. 1926ʼ во кежлӧ став Обласьтувса учрежденньӧсӧ пӧртны комиӧ.
