ОТСАЛӦЙ КОМИ СТУДЕНТЪЯСЛЫ!
Коми муысь гырысь роч каръясын велӧдчӧны морт кыксё кымын. Найӧ во кык-куим мысти бӧр воасны уджавны миянӧ (Коми Обласьтӧ), велӧдны пемыд коми йӧзӧс, кыпӧдны татчӧс овмӧс. Вӧрзьӧдасны, ловзьӧдасны сэки миянлысь тыр-бур оланіннымӧс! Сэки лоасны асланым коми инженеръяс, коми землемеръяс, коми докторъяс, уна пӧлӧс коми велӧдчӧм йӧз. Миянлы найӧ зэв колан йӧз! Ми вывті на пемыдӧсь, став Коми муса эмбурыс миян шняпвидзӧ-куйлӧ, вӧрзьӧдысьяс эз вӧвлыны. Велӧдчӧм йӧзтӧг ми некор огӧ вермӧй суӧдны мукӧд йӧзӧс, дыр на лоӧ нуждасӧ пыкны. Войдӧр коми йӧзӧс эз сибӧдлыны гырысь школаясӧ, ӧдзӧсыс миянлы сэтчӧ вӧлі пӧдса. Ӧні Сӧвет власьт восьталіс гырысь школа ӧдзӧсъяс быд уджалысь йӧзлы. Со и комилы воссис велӧдчыны туй. Сӧмын миян государство зэв на гӧль. Кузь войнаяс, лёк вояс ёна кисьтісны (уськӧдісны) овмӧс. Быдлаті колӧ дӧмны, уналаті колӧ выльысь вӧчны. Быдлаӧ, дерт, гӧль государстволӧн оз судзсьы сьӧм (деньга). Со и став студентъясӧс (гырысь школаясын велӧдчысьясӧс) велӧдны оз на жӧ судзсьы сьӧмыс. Мый вермӧ, дерт, отсалӧ-кокньӧдӧ. Да ӧд и студентъяслы унатор колӧ: колӧ патераысь мынтысьны, гырысь каръясын патераясыд донаӧсь, колӧ нигаяс ньӧбны, колӧ сёйны-юны, колӧ овны, — быдлаӧ ӧні колӧ деньга.
Миян коми студентъяс унаысь нин гижлісны: «Отсалӧй пӧ миянлы, бур коми войтыр, велӧдчыны, сетӧй пӧ миянлы неуна отсӧг тайӧ вояссӧ вуджны, велӧдчӧм йӧзӧ воштысьны! Ми пӧ кончитӧм бӧрын тіянлы ыджыд пӧльза сетам, став велӧдчӧмнымӧс пӧ пуктам коми йӧзӧс кыпӧдӧм вылӧ, Коми му ловзьӧдӧм вылӧ!»
Сӧмын тай этша на ми отсаламӧ! Студентъяс миян олӧны дзик коньӧръяс моз: ньылӧдӧм кӧдзыдінъясын (пӧдвалъясын), тшыгъялӧны, висялӧны. Оз и тӧдны, мый дінӧ кутчысьныныс: велӧдчӧмӧ, али кынӧмпӧт перйыны, либӧ кӧнкӧ шонтысьны...
Колӧ прамӧйджыка, бурджыка коми йӧзлы видзӧдлыны асланым студентъяс вылӧ! Кыксё мортӧс вермам жӧ на кыксё сюрс коми йӧз видзны! Быдӧнлы колӧ тӧдны: мӧдысь найӧ миянлы жӧ ыджыд бурсӧ вӧчасны. Велӧдчӧм коми пиян ыджыд аттьӧ шуасны ӧніяся ичӧтик отсӧг пыдди. Найӧ водзӧссӧ сёысь унджык мынтасны миянлы асланыс велӧдчӧмлуннаныс!
Тӧждысьӧй нӧ, бур коми войтыръяс, коми студентъяс вӧсна! Отсалӧй налы велӧдчыныныс, коді мыйӧн вермас: деньгаӧн, няньӧн, тӧварӧн, мукӧдторйӧн!
Быд карӧ, быд вӧлӧсьтӧ ӧнісянь жӧ восьталӧй коми студентъяслы отсӧг чукӧртанінъяс (комитетъяс) да бурджыка уджалӧй!
Сыктывкарын Обоноын сэтшӧм комитетыс эм нин. Сэсся миян газет редакция босьталӧ деньгаӧн отсалӧм (пожертвованньӧ).
Нолтӧ, босьтчыламӧй ставным отсавны асланым студентъяслы! Мед найӧ долыда, нимкодьпырысь, бура велӧдчисны да миянӧс регыдджык выль олӧмӧ кыпӧдісны!
