В. Ӧ. САВИН

(Нёбдінса Виттор йылысь)

Аслам гижӧдын «Сьӧд Яков» 1907 воын, медчорыд воясас коми олӧмын, ме гижлі: «Коми оланін кузя югнитлас на шонді, нюр вомӧнысь бырӧ ру, сувтасны мича лунъяс».

10 во мысьт сійӧ гижӧмъяс бӧрын паськыда зэв коми олӧм воссис. Сэк кӧ вӧлім кыкӧн-куимӧн, ӧні унаӧн нин, гӧгӧр содім, содам на. «Коми йӧзлы — коми гижӧд, коми йӧзлы — коми кыв» уджӧ пӧрис, олӧманым пырис. Унаӧн босьтчисны колан уджсӧ вӧчны, вит восӧ чорыда нин уджалӧны, уджалам.

Медзіля, ёна, сьӧлӧмсьыс, юрӧн уджаліс миян коми олӧм вылын Нёбдінса Виттор. Эз на важӧн, 22 лунӧ колян тӧлысьын, сылы лои 35 арӧс чужӧмсяньыс, коми сьӧлӧмлысь визьяссӧ аслас гижӧднас сійӧ миянлы петкӧдліс, коми олӧмысь буринъяссӧ, омӧлинъяссӧ. Сійӧ нӧ медчорыда коми сьылӧм вылын пессис, ворсӧм вылын — сэтшӧм ворсӧм вылын, коді миянлысь ассьыным олӧмнымӧс петкӧдлӧ.

Виттор коми олӧмлы колана морт, колана морт миян став уджалысь йӧзлы, ӧніялы и водзӧ.

Гижӧдъясыс, сьыланъясыс, ворсӧмъясыс — ӧнія югъялан шонді миян Коми му кузя, ӧнія гажа коми олӧм лунъяс. Пемдӧдан роч ру вешйӧ, ёна отсаліс вит вонас вештынысӧ Виттор! Дыр на отсалас и водзӧ, оз мудз, оз дышӧдчы, кыдз ӧнӧдз эз на дышӧдчыв.

Велӧданінъясын, велӧдчанінъясын гижӧдъяссӧ витӧд во нин велӧдам, тӧдмалам, лыддям. Лыддьысь, велӧдчысь Савинлӧн пыр на содӧ воысь воӧ. Воас кад, став уджалысь коми йӧз унджык гижӧдсӧ сылысь пондас тӧдны, сьыланкывъяссӧ сьывны, ворсанторъяссӧ том йӧз пондасны ворсны.

Мувыв олӧмса долыдлунлань воысь воӧ пыр матыстчам. Бура, чорыда сылань аслас гижӧднас, аслас уджъяснас Нёбдінса Виттор ёна нин вит во чӧж йӧткаліс, йӧткыштіс. Ӧнія гӧгӧрвоысь йӧз, олӧма, быдмысь шуам Савинлы бур кыв бур удж пыддиыс, огӧ вунӧдӧй асьсӧ, уджъяссӧ! Велӧдчам сійӧ бур сьӧлӧмлысь, велӧдчам сійӧ бур гижӧдлысь, бур мӧвпалӧмлысь. Сійӧ гижӧд серти, чорыдджыка водзӧ тувччыштчам, сыныштчам важ ног олӧмсьыс! Ставсӧ сійӧ вӧчны ми вермам: Савин аслас уджъяснас, олӧмнас тшӧтш петкӧдлӧ. Вит во сылы: асьсӧ ставӧн эгӧ тӧдлӧ, эгӧ кывлӧ уджъяссӧ, ӧні быдсӧн тӧдам, паськыда кылӧны миян паськалӧм коми олӧмкӧд.

Бурсиам миян коми гижысьлы, бурсиам миян коми йӧзлы, коді ас пиысь вермӧ сетавны Савин кодьсӧ ӧтик вит воӧн куш. Коми йӧзлӧн эз вӧв сылысь олӧмсӧ гижысь — лоӧ, мед гӧгӧр босьтіс Савин, миян коми йӧзлӧн сюсь, тӧдана бур гижысь.

Габӧ Педӧр Ӧлексан пи Ӧлексей нима.