ТӦЖДЫСЬӦЙ ЧЕЛЯДЬ ВӦСНА!

Война да тшыг вояс ёна уськӧдісны овмӧсъяс. Уна челядь колины мамтӧм-батьтӧмӧсь, дӧзьӧритны некодлы. Ветлӧны, коньӧръяс, корӧны, кынмӧны, висьӧны, кулӧны. Дерт, видзтӧг найӧ тшыксялӧны — велӧдны бур туйӧд мунны некодлы. Наысь лоӧны омӧлик йӧз, огӧ кӧ ми босьтчӧй на вӧсна тӧждысьны.

Унаысь нин эськӧ ми гижлім та йылысь да, этша на, буракӧ, йӧз сьӧлӧмӧ мӧрччӧма — челядь век на ветлӧны Коми му кузя, корсьӧны кынӧмпӧт.

Босьтчыламӧй, бур войтырӧй, видзны челядьӧс! Шонтыштамӧй найӧс, лоамӧй налы мам-бать пыдди!

Велӧдысьяс, тіянлы колӧ медводз кутчысьны тайӧ удж бердӧ!